Komum skemmtiferðaskipa fjölgar

Met­fjöldi skemmti­ferða­skipa kemur til landsins á næsta ári og fjölgar um nærri þrjú hundruð frá því í ár. Helstu hafnir eru þegar upp­seldar ein­hverja daga á næsta ári. Ekkert lát er þó á bókunum.

Fjöldi skemmti­ferða­skipa sem væntan­legur er á næsta ári til þeirra þriggja hafna hér á landi sem þjónusta flestu fleyin af því tagi, í Reykja­vík, á Ísa­firði og Akur­eyri, nálgast nú átta hundruð. Fjölgunin frá því í ár verður ekki minni en sex­tíu prósent.

Sam­tals komu 478 skemmti­ferða­skip til þessara hafna í ár, en þegar hafa for­kólfar 763 skipa pantað þar hafnar­legu á næsta ári – og sér ekki fyrir endann á bókunum.

„Það er orðið upp­selt hjá okkur ein­hverja daga á næsta ári,“ segir Gunnar Tryggva­son, hafnar­stjóri Faxa­flóa­hafna, en fyrir vikið gætu ein­hver skip þurft að liggja við festar á ytri höfninni.

Hann segir 180 skip hafa lagst við Gömlu höfnina og Skarfa­bakka í ár, en þegar hafi 270 verið bókuð á næsta ári. Tekjur af þjónustunni fari úr 700 milljónum í ár yfir á annan milljarð á næsta ári.

„Á­stæða þessa upp­gangs er þrí­þætt, stóri markaðurinn í Karíba­hafi er löngu mettaður, Úkraínu­stríðið hefur lokað fyrir demantinn í Eystra­salts­siglingum, sem er Péturs­borg í Rúss­landi, og svo er ný og ferða­vön kyn­slóð að upp­götva töfra norður­slóða,“ út­skýrir Gunnar.

Pétur Ólafs­son, hafnar­stjóri Hafnar­sam­lags Norður­lands, bætir því líka við að Asíu­markaðurinn í siglingum af þessu tagi hafi gefið eftir. Á því græði norður­slóðir. Og hann getur ekki kvartað yfir vextinum á milli ára. „Við förum úr 180 skipum í ár í minnst 280,“ segir hann, en gnoðin nyrðra liggja jöfnum höndum við kajann á Akur­eyri, Hrís­ey og Gríms­ey.

„Þessum skipum hefur einna mest fjölgað í Hrís­ey, en allt að sex­tíu minni skip hafa boðað komu sína þangað á næsta ári,“ segir Pétur og á­ætlar að tekjur af skipa­komunum nyrðra á næsta ári nálgist milljarðinn.

Sami upp­gangur er á Vest­fjörðum. Guð­mundur Magnús Kristjáns­son, sem klárar ára­tuga­langa hafnar­stjóra­vaktina sína í næsta mánuði, man ekki annað eins. „Við erum að auka við­legu­rýmið hérna á utan­verðri eyrinni um helming,“ bendir hann á – og veitir ekki af. Ekki færri en 213 skip verða bundin við ís­firskar land­festar árið 2023, en voru 118 í ár.

„Tekju­aukning hafnar­sjóðs verður veru­leg, fer úr helmingi af tekjum hans í minnst sjö­tíu prósent,“ segir Guð­mundur.