Kol­beinn Óttars­son Proppé, þing­maður Vinstri hreyfingarinnar græns fram­boðs, hefur dregið fram­boð sitt til baka til annars Reykja­víkur­kjör­dæmisins vegna kvartana sem bárust til fagráðs VG ný­verið. Hann segir að í þessari nýjustu bylgju #metoo geti hann ekki staðið með konunum sem líður illa hans vegna ef hann er áfram í framboði.

Þessu greinir Kol­beinn sjálfur frá í til­kynningu á sam­fé­lags­miðlum. Þar segir hann að hann hafi komið illa fram við konur.

„Ég hef gefið til kynna lang­tíma­sam­band, byggt á heitum og djúpum til­finningum. Og þær hafa verið það. En svo hleyp ég í felur, brest undan. Hugsa meira um að verja mig mögu­legum skaða en það hvernig ég kem fram. Geri það því illa, kem illa fram. Læt konunum líða eins og þær hafi ekki skipt mig máli, sem er kol­rangt. Að þær geri það ekki lengur, sem er líka kol­rangt. Skríð inn fyrir skelina mína og í öryggið og ein­mana­leikann þar,“ segir Kol­beinn í færslu sinni.

Hann segir að á sama tíma hafi hann oft verið svo ein­mana að til­finningin hafi hel­tekið hann og á­hyggjur af því að vera alltaf einn.

„Minn mesti ótti er að ég sé dæmdur til að vera einn af því að ég geti ekki gefið það af mér sem þarf til að koma í veg fyrir ein­mitt það,“ segir Kol­beinn.

Hann segist hafa sína djöfla að draga og að það sé ýmis­legt ó­upp­gert úr for­tíð hans. Hann hafi þó undan­farna mánuði fundið eitt­hvað breytast innan í sér.

„…ég er að verða opnari og ó­hræddari, í minni vörn. Þegar mér svo barst til eyrna að hegðun mín hefði valdið konu mikilli van­líðan varð ég fús til að leita mér að­stoðar vegna þessa. Ég vil ekki koma þannig fram að öðru fólki líði illa. Ég vil ekki sýna af mér hegðun sem konur upp­lifa sem ó­eðli­lega.

Nú er mikil og þörf bylgja í gangi þar sem konur segja frá. Það er að­dáunar­vert að þær geri það og ég vona inni­lega að gott komi út úr því,“ segir Kol­beinn og að í kjöl­farið á því hafi verið leitað til fagráðsins með kvartanir vegna hegðunar hans.

Hann segir að ferlið hafi opnað augu hans.

„Það ferli sem þá fór af stað opnaði augu mín fyrir því að ýmis­legt hefur verið á­bóta­vant í minni hegðun. Ég á­kvað engu að síður að gefa kost á mér í for­vali Vinstri grænna í Reykja­vík. Um­ræða undan­farinna daga hefur hins vegar gert það að verkum að ég hef endur­skoðað þá á­kvörðun,“ segir Kol­beinn.

Hann segir að lokum að hann sé hluti af valda­kerfi og feminískum flokki sem eigi að standa með konum.

„Ég held að ég geti ekki staðið bæði með mér og konunum sem líður illa mín vegna á meðan ég er í fram­boði fyrir VG. Og Vinstri­hreyfingin – grænt fram­boð, eða nokkur þar innan borðs, á ekki að þurfa að svara fyrir mína hegðun,“ segir Kol­beinn.

Hann segir að hann einn beri á­byrgð á hegðun sinni og biðst af­sökunar á henni.

„Það góða kom út úr þessu öllu að ég er að leita mér að­stoðar til að ráða betur við sam­skipti og tengsl og mun halda því á­fram. Það er hins vegar best fyrir öll að ég boði brott­för mína úr hinu opin­bera rými í haust. Ég dreg fram­boð mitt í for­vali Vinstri grænna í Reykja­vík til baka og verð því ekki í fram­boði í kosningunum. Ég þakka öllu því góða fólki sem hvatti mig og studdi og þykir leitt að valda því von­brigðum,“ segir Kol­beinn að lokum.

Færsluna er hægt að lesa í heild sinni hér að neðan.

Ég hef ýmis­legt að læra og mun leggja mig fram við að verða að betri manni. Ég vona að þessi á­kvörðun mín verði til ein­hvers góðs.

Dreg framboð mitt til baka Ég hef í all nokkur ár átt í erfiðleikum með að mynda náin tengsl. Kemur þar ýmislegt til, en...

Posted by Kolbeinn Óttarsson Proppé on Tuesday, 11 May 2021