Samfylking og Sjálfstæðisflokkur mælast með um 21 prósents fylgi í nýrri könnun Zenter rannsókna fyrir Fréttablaðið og frettabladid.is. Miðflokkurinn mælist með 4,3 prósent og næði samkvæmt því ekki manni á þing.

Könnunin var framkvæmd 3.-4. desember, það er eftir að upp komst um fyllirísraus fjögurra þingmanna Miðflokks og tveggja úr Flokki fólksins. Þá er hún sömuleiðis gerð eftir að Flokkur fólksins rak þingmennina tvo úr flokknum og tveir þingmanna Miðflokksins fóru í ótímabundið leyfi frá störfum. 

Samkvæmt könnuninni mælist fylgi Miðflokksins 4,3 prósent eða rúmlega þriðjungur kjörfylgis hans. Fylgi við flokkinn mælist 1,5 prósentustigum hærra á landsbyggðinni. Sé miðað við efri vikmörk mælingarinnar myndi flokkurinn fá jöfnunarþingmenn en nær hvergi kjördæmakjörnum þingmanni.

Tveir flokkar tróna á toppnum

Sjálfstæðisflokkurinn mælist með 21,4 prósent og kemur Samfylkingin næst með 20,8 prósent. Sá fyrrnefndi tapar um fjórum prósentustigum frá kosningum en sá síðarnefndi bætir við sig tæpum níu. Píratar mælast þriðji stærsti flokkur landsins með 14,4 prósent og bæta við sig fimm prósentustigum.

Stutt er í Vinstri græn með 12,7 prósent en flokkurinn fékk tæp sautján í kosningunum. Viðreisn mælist með 9,1 prósent en fékk 6,7 í kosningum og Framsóknarflokkur mælist með 8,5 prósent, fékk 10,7 prósent í kosningunum. Flokkur fólksins mælist svo með 5,7 prósent, fékk 6,9 í kosningunum 2017. Þrjú prósent segja að þau myndu kjósa aðra flokka en þá sem eiga sæti á þingi.

Séu niðurstöður könnunarinnar nýttar til að útdeila þingsætum fengju Sjálfstæðisflokkur og Samfylking fimmtán menn hvor flokkur. Píratar fengju tíu, Vinstri græn átta og Viðreisn og Framsókn sex menn hvor flokkur. Flokkur fólksins væri síðastur inn með þrjá.

Logi Einarsson, formaður Samfylkingarinnar, gleðst yfir tölunum. „En ég er auðvitað meðvitaður um það að þetta er könnun og hún er gerð á sérkennilegum tíma,“ segir hann.

Óvenjulegir dagar að baki

„Þetta endurspeglar væntanlega afstöðu fólks til þessa máls sem hefur komið fram að undanförnu,“ segir Logi um gengi Miðflokksins.

„Það eru engin stórtíðindi í því fyrir mig,“ segir Bjarni Benediktsson, formaður Sjálfstæðisflokksins, um fylgi síns flokks. „Við mældumst á þessum slóðum dagana fyrir síðustu kosningar. Þetta hafa verið óvenjulegir dagar að undanförnu.“

„Það var alveg við því að búast að það yrðu einhver merki um fyrstu viðbrögð í könnun sem er gerð ofan í þá umræðu sem hefur verið og það kemur mér í sjálfu sér ekki á óvart,“ segir Bjarni um útkomu Miðflokksins.

Ekki náðist í Sigmund Davíð Gunnlaugsson, formann Miðflokksins, við vinnslu fréttarinnar.

13 prósent Miðflokksfólks vill afsögn 

Einnig var spurt um hvort sexmenningarnir af Klaustri ættu að segja af sér þingmennsku. Alls svöruðu játandi 90,9 prósent þeirra sem afstöðu tóku. 9,1 prósent sagði nei.

Sé horft til afstöðu svarenda eftir því hvaða flokk þeir sögðust ætla að kjósa má sjá að heilt yfir svaraði mikill meirihluti stuðningsmanna allra flokka utan Miðflokksins játandi. Einungis þrettán prósent þeirra sem sögðust styðja Miðflokkinn vilja að sexmenningarnir segi af sér. Stuðningsmenn Sjálfstæðisflokksins komust næst því að vera á sama máli en þeirra á meðal voru þó ekki nema 23,7 prósent sem svöruðu neitandi. 

Aðferðafræði

Könnunin var send á 2.300 einstaklinga úr könnunarhópi Zenter. Spurt var annars vegar „hvaða flokk myndir þú kjósa ef gengið yrði til kosninga í dag?“ og hins vegar „hvaða flokk væri líklegast að þú myndir kjósa?“ Svarhlutfall var 55 prósent en um þriðjungur tók ekki afstöðu til spurningarinnar. Gögnin voru vigtuð eftir kyni, aldri og búsetu.