Sautján ára gömul stúlka í Utah ríki olli árekstri á þjóðvegi í síðustu viku en stúlkan var með bundið fyrir augun og var að taka þátt í hinni svokölluðu „Bird Box áskorun.“ Betur fór en áhorfðist og meiddist enginn alvarlega þó tveir bílar hafi gjöreyðilagst.

Um er að ræða gífurlega vinsæla bíómynd sem framleidd er af streymisveitunni Netflix sem milljónir hafa horft á og er Sandra Bullock í aðalhlutverki. Í myndinni þarf persóna hennar að hafa bundið fyrir augun til að forðast dularfullar verur og hefur uppátækið orðið að svokölluðu „netfyrirbæri“ og hafa þúsundir prófað að binda fyrir augu sín við daglegt amstur.

Sjá einnig: Biðja fólk um að fara varlega í Bird Box áskoruninni

Líkt og áður segir batt stúlkan fyrir augu sín og keyrði hún bílnum fljótlega yfir á næstu akrein, þar sem hún keyrði utan í annan bíl og skutust báðir bílarnir út af veginum og bíll stúlkunnar á ljósastaur og á vegg. Ótrúlegt þykir að enginn hafi meiðst alvarlega.

Lögregluyfirvöld á svæðinu birtu færslu þar sem farið var yfir atvikið. Það var sagt með ólíkindum að taka yrði fram að ekki ætti að keyra bíla með bundið fyrir augun. Lögreglan tók það þó fram, að aldrei, undir nokkrum kringumstæðum ætti að aka þannig.

Myndband þar sem maður hljóp með ungabarn sitt á vegg í áskoruninni varð meðal annars til þess að Netflix bað fólk um að fara varlega í áskoruninni, líkt og sjá má í fréttinni sem vísað er í hér fyrir ofan.