Klakkur er afskekkt 999 metra hátt fjall í suðvestanverðum Langjökli, nánar tiltekið við enda Vestari-Hagafellsjökuls. Þetta er afar formfagur tindur og minnir á píramídana frægu í Gísa, sérstaklega þegar komið er að honum af Langjökli sem umlykur hann alls staðar nema í suður. Það eru til mörg fjöll á Íslandi sem heita Klakkur, meðal annars í botni Kollafjarðar á Ströndum, en nafnið vísar til tré- eða járnpinna sem festir voru við klyf bera á hestum. Á klyf bera var hengdur varningur ýmiss konar til flutnings en fram á 20. öld voru klyfjahestar mikilvægasta flutningstæki hérlendis uns kerrur, bifreiðar og dráttarvélar leystu þá af hólmi. Klyf beri var gerður úr tveimur fjölum sitt hvorum megin við hrygg hestsins sem festar voru með tréboga sem á voru tveir til þrír tré- eða járnpinnar og kölluðust klakkar. Af þessu er dregið orðatiltækið „að komast klakklaust yfir eitthvað“, það er, komast leiðina áfallalaust og festast ekki í klökkunum. Reyndar er auðvelt að komast klakklaust upp og niður Klakk, enda þótt fjallið sé býsna bratt og laust í sér efst.

Séður frá hlið líkist Klakkur svart-hvítum KR-ingi. Til hægri sést í Högnhöfða og stapann Hlöðufell.
Mynd/TG

Þess vegna er skynsamlegt að klífa fjallið að vori eða snemmsumars með jöklabúnaði og nýta sér snjókafla í norðurhlíðum þess. Suðurhlíðarnar verða hins vegar snjólausar fyrr og séður frá hlið líkist Klakkur því svart-hvítum KR-ingi eða Oreo-kexköku. Klakkur er fáfarinn tindur, enda er hann utan alfaraleiða. Snemmsumars má ganga að honum af línuvegi norðan Skjaldbreiðs, til dæmis við Þórólfsfell, og er þá gengið yfir sanda og hraun beint í suður um 15 km leið. Enn skemmtilegri leið má fara á ferðaskíðum frá skálanum Klaka við vestanverðan Langjökul, skammt frá Kaldadal, en þar er lagt í snjóbílaferðir að íshelli innar á jöklinum. Frá Klaka eru 12 km að Klakki en gengið er fram hjá Geitlandsjökli sem er eins konar útskot úr Langjökli og hækkunin lítil. Efst á Klakki býðst frábært útsýni og ber mest á nálægum Þórisjökli og Geitlandsjökli en í austur sést í Jarlhettur, Bláfell, Heklu, Tindfjalla- og Eyjafjallajökul. Í suðri blasa síðan við Högnhöfði, Hlöðufell og Skjaldbreiður en einnig sést inn í Þórisdal. Þar var löngum talið að útilegumenn héldu sig og forðuðust bændur að heimsækja dalinn til að smala.

Útsýni af tindi Klakks er stórkostlegt. Geitlandsjökull og Þórisdalur í baksýn.
Mynd/Sigurður G. Sveinsson

Efst á Klakki býðst frábært útsýni og ber mest á nálægum Þórisjökli og Geitlandsjökli en í austur sést í Jarlhettur, Bláfell, Heklu, Tindfjalla- og Eyjafjallajökul. Í suðri blasa síðan við Högnhöfði, Hlöðufell og Skjaldbreiður en einnig sést inn í Þórisdal. Þar var löngum talið að útilegumenn héldu sig og forðuðust bændur að heimsækja dalinn til að smala.