Frumvarp landbúnaðarráðherra um innflutning á fersku kjöti til landsins var afgreitt út úr atvinnuveganefnd í gærkvöldi. Nefndarálit og hugsanlegar breytingartillögur lágu ekki fyrir þegar Fréttablaðið fór í prentun.

„Sýklalyfjaónæmar bakteríur eru ein mesta ógn samtímans. Í dag liggja þrír inni á Landspítalanum með þannig bakteríur. Við verðum að bregðast við og þora því,“ sagði Halla Signý Kristjánsdóttir, þingmaður Framsóknarflokksins og annar varaformaður atvinnuveganefndar, fyrir nefndarfundinn.

Halla Signý sagði að bregðast þyrfti við dómi Hæstaréttar með því að afnema frystiskyldu. Verið væri að skoða ýmsar til að mæta þeim áskorunum sem þessu fylgi.

„Við erum að leita leiða til að banna dreifingu á matvælum sem innihalda ákveðnar tegundir sýklalyfjaónæmra baktería, alveg eins og við gerum hér innanlands þegar salmonella greinist. Við erum þá að gera sömu kröfur til matvæla erlendis frá og til innlendrar framleiðslu.“

Verkefnið sé ekki einfalt og taka þurfi mikið af sýnum. „Vísindaheimurinn er að þróa aðferðir til að taka og greina svona sýni á ódýrari og skilvirkari hátt. Þetta snýst ekki bara um að vernda innlenda framleiðslu, þetta snýst líka um heilsu þjóðarinnar og að íslenskur landbúnaður keppi á jafnvægisgrundvelli.“