Kia vann til þriggja Red Dot verðlauna á dögunum fyrir bíla sína Stinger, Stonic og Picanto. Þessir þrír nýju bílar frá Kia unnu allir sína flokka auk þess sem Stinger vann flokkinn ,,Best of the Best" hjá Red Dot sem þykir sérlega eftirsóknarvert. Red Dot verðlaunin eru ein þau virtustu í hönnunarheiminum. Þessir þrír bílar unnu einnig alþjóðlegu hönnunarverðlaunin, iF Design Award í ársbyrjun. Stinger og Stonic eru báðir glænýir bílar úr smiðju Kia, en Picanto er að koma nýr af þriðju kynslóð. 

Kia hefur náð framúrskarandi árangri í Red Dot verðlaununum og unnið alls til 21 verðlauna þar síðan árið 2009 þegar Kia Soul vann þau í fyrsta skipti það ár. “Hönnunarteymi Kia hefur unnið hörðum höndum af því að framleiða fallega og góða bíla og þetta er viðurkenning fyrir þá vinnu,” sagði Þjóðverjinn Peter Schreyer, einn af æðstu yfirmönnum Kia og yfirhönnuður Kia Motors. Schreyer, sem var áður yfirhönnuður hjá Audi, hefur átt stóran þátt í velgengni Kia á síðustu árum.