Kerfisbundið vanmat á störfum kvenna er óásættanlegt að mati BHM og er slík leiðrétting nauðsynleg til að mæta skorti á fagmenntuðu fólki til starfa í heilbrigðiskerfinu.

Á aðalfundi bandalagsins, sem fór fram í gær, var samþykkt ályktun um mikilvægi þess að leiðrétta skakkt verðmætamat á vinnumarkaði án tafar.

Þetta er meðal þess sem kemur fram í tilkynningu frá BHM.

BHM krefst þess að tillögur starfshóps forsætisráðherra um endurmat á virði kvennastarfa frá 2021 komi til framkvæmda.

Háskólamenntun kvenna sé jafn mikils virði og karla og að það eigi að endurspeglast í launasetningu.

Rannsóknir hafi sýnt að kynskiptur vinnumarkaður sé meginorsök kynbundins launamunar.

Í tilkynningu frá bandalaginu segir jafnframt að þess sé sérstaklega krafist að yfirlýsing sem undirrituð var af forsætisráðherra, fjármála- og efnahagsráðherra og heilbrigðisráðherra frá 2018 komi til framkvæmda.

„Íslenskt samfélag er statt í kreppu nýliðunar- og mönnunarvanda í heilbrigðis- og félagsþjónustu. Leiðrétting á launasetningu hefðbundinna kvennastarfa er þannig nauðsynleg til að mæta skorti á fagmenntuðu fólki til starfa í velferðarkerfinu.“