Karlmaður á fertugsaldri var í kvöld í Héraðsdómi Reykjavíkur úrskurðaður í gæsluvarðhald til föstudagsins 19. febrúar á grundvelli rannsóknarhagsmuna að kröfu lögreglunnar á höfuðborgarsvæðinu. Krafan er gerð í þágu rannsóknar lögreglunnar á manndrápi í Rauðagerði rétt fyrir miðnætti í gær. Frá þessu er greint í tilkynningu frá lögreglunni á höfuðborgarsvæðinu.

Töluverður viðbúnaður var í Hafnarstræti í kvöld þegar maðurinn var leiddur fyrir dómara í Héraðsdómi Reykjavíkur. Sérsveitarmenn voru í ómerktum bílum í götunni í viðbragðsstöðu.

Hvorki verjandi mannsins né lögregla vildu veita Fréttablaðinu viðtal þegar maðurinn var leiddur út í járnum í kvöld.

Maðurinn huldi andlit sitt þegar hann var leiddur í lögreglubíl.
Fréttablaðið/Anton Brink

Eins og áður hefur verið greint frá var albanskur maður á fertugsaldri skotinn í gærkvöldi. Maðurinn lætur eftir sig ólétta eiginkonu sína og ungt barn. Konan, og barn hans, voru heima þegar hann var skotinn til bana fyrir utan heimili þeirra.

Töluverður viðbúnaður var á vettvangi.
Fréttablaðið/Anton Brink

Nágrannar mannsins hafa greint frá því að hafa ekkert heyrt í gærkvöldi og ekki orðið þess vör að nokkuð væri að fyrr en lögreglan mætti á vettvang.

Fréttin hefur verið uppfærð.