Karlmaður á fertugsaldri var í fyrradag úrskurðaður í tveggja vikna gæsluvarðhald í Héraðsdómi Reykjavíkur að kröfu lögreglunnar á höfuðborgarsvæðinu.

Þetta kemur fram í tilkynningu frá lögreglunni.

Lögreglan óskaði eftir gæsluvarðhaldi vegna rannsóknar hennar á alvarlegum kynferðis- og ofbeldisbrotum.

Maðurinn er grunaður um að hafa brotið gegn tveimur konum í tveimur aðskildum málum á höfuðborgarsvæðinu um verslunarmannahelgina.

Gæsluvarðhaldsúrskurðurinn hefur verið kærður til Landsréttar en lögreglan getur ekki gefið frekari upplýsingar um málið að svo stöddu.