Kópurinn sem fannst einn og veikburða á Suðurnesjum í janúar er nú allur að braggast. Lögreglan á Suðurnesjum kom honum í öruggar hendur í Húsdýragarðinum en hann reyndist illa haldinn af næringarskorti og með sýkingu í auga. Húsdýragarðurinn tilkynnir í dag að hringanórinn sem hlaut nafnið Kári, hafi verið sýktur af sníkjudýrum m.a. af lungnaþráðormi sem hafi ekki fundist hér á landi áður.

„Sníkjudýr geta reynst selum sem orðnir eru heilsuveilir og horaðir hættuleg. Lungnaormar krækja sig fasta í þekjuvef lungna og berkja og geta þar valdið bólgum og sýkingum sem aftur draga mjög úr köfunarhæfni selanna og torvelda þeim þannig fæðunám. Ekki er ólíklegt að slík hafi verið raunin hjá þessum sel enda vó hann einungis 7,6 kg við komuna hingað. Eðlileg þyngd tegundarinnar eftir um 8 vikur á spena er um 20 kg.“

Kann best við sig í snjónum


„Nú er hins vegar búið að meðhöndla þá kvilla sem hér eru taldir upp og selurinn, sem nefndur er Kári, er farinn að taka hressilega til matar síns. Þessa dagana étur hann um 8 síldir daglega og er nú orðinn rúmlega 10 kíló. Yfir daginn er Kári úti við þar sem hann virðist kunna best við sig í snjónum en á nóttunni er hann í sérstakri innilaug fullri af sjó,“ segir í tilkynningu frá Húsdýragarðinum.

Jafnframt segir að ráðgjafar frá selasetri Íslands á Hvammstanga hafi notið við við umönnun kópsins sem og frá sérfræðingum á selabjörgunarstöðvum á Írlandi og dýralæknis í Alaska.


„Ef heldur fram sem horfir og Kári heldur áfram að þyngjast hratt verður vonandi hægt að sleppa honum aftur. Í því sambandi verður að horfa sérstaklega til eftirfarandi: Aukin þyngd hans og betri heilsa við sleppingu eykur lífslíkur hans í náttúrunni. Á móti dregur lengri dvöl hans í haldi manna úr líkum þess að hann geti bjargað sér í náttúrunni. Það er því mikilvægt að finna jafnvægi á milli þessara þátta til þess að tryggja sem besta möguleika Kára.“


Gestir garðsins geta heimsótt Kára þar sem hann er úti við yfir hádaginn.