Kári Stefánsson, forstjóri Íslenskrar erfðagreiningar, kom til fundar í stjórnarráðið nú fyrir stundu. Hann kom þangað með leigubíl ásamt upplýsingafulltrúa sínum Þóru Kristínu Ásgeirsdóttur.

Kári var gestur í Kastljósi RÚV í kvöld í Kastljósi í gærkvöldi þar sem hann lýsti mikilli óánægju með heilbrigiðisráðuneytið en Íslensk erfðagreining átti ekki fulltrúa í verkefnastjórn heilbrigðisráðherra um opnun landamæra þann 15. júní.

Fréttablaðið hefur ekki fengið upplýsingar um efni fundar Kára með forsætisráðherra en Kári sagði í Kastljósi að fyrirtækið muni ekki koma að skimunum á Keflavíkurflugvelli verði verkefnið unnið undir stjórn heilbrigðisráðuneytisins.

Hann hrósaði Svandísi Svavarsdóttur heilbrigðisráðherra fyrir góð störf en sagði hana um leið stundum hegða sér eins og „lítil tíu ára stelpa sem lætur ekki neinn segja sér neinn skapaðan hlut.“

Sagði Svandísi hrokafulla

„Í hroka sínum þá hefur hún ekki treyst sér til að leita til okkar,“ sagði Kári.

„Nú veit ég ekki hvernig stendur á því. Kannski er það vegna þess við erum einkafyrirtæki og einkafyrirtæki eru vond.“

Starfsfólki í Vatnsmýrinni sárnaði

Að sögn Kára vill fyrirtækið ekki koma að verkefninu ef það fær ekki eiga þátt í skipulagningu þess. Sárnar honum að ekki hafi verið leitað til þeirra fram að þessu. Hann sagði starfsfólk fyrirtækisins hafa móðgast þegar Svandís nefndi það ekki í þakkarræðu sinni á síðasta upplýsingafundinum.

Lokað fyrir símanúmer Þórólfs

„Við ætlum ekki að koma að þessari skimun ef hún verður unnin undir stjórn heilbrigðismálaráðuneytisins. Vegna þess að samskiptin við heilbrigðismálaráðuneytið eru þannig að við treystum okkur ekki til þess.“

Þrátt fyrir þetta sagðist Kári eflaust vera til í að ræða aðkomu Íslenskrar erfðagreiningar ef Þórólfur Guðnason sóttvarnalæknir myndi óska eftir því.

Aðspurður um það hvort hann ætti ekki von á því símtali sagðist Kári hafa lokað fyrir símtöl frá Þórólfi af einmitt þeirri ástæðu.