Karen Elísabet Halldórsdóttir bæjarfulltrúi í Kópavogi sækist eftir fyrsta sæti í prófkjöri Sjálfstæðisflokksins í Kópavogi sem fram fer þann 12. mars. Hún hefur starfað í bæjarstjórn Kópavogs í átta ár.

Karen Elísabet, sem er með BA gráðu í sálfræði og meistaragráðu í mannauðsstjórnun, starfar sem skrifstofustjóri samhliða störfum fyrir sveitarfélagið.

Hún sendi fréttatilkynningu á fjölmiðla í dag þar sem hún kynnti um framboð sitt til fyrsta sætis Sjálfstæðismanna í Kópavogi. Hún hefur starfað í bæjarstjórn í átta ár og sinnir ýmsum trúnaðarstörfum fyrir Kópavog. Hún er varaformaður bæjarráðs, formaður velferðaráðs, lista- og menningarráðs og öldungaráðs. Einnig hefur hún setið í ráðgjafanefnd Jöfnunarsjóðs Sambands íslenskra sveitafélaga í tæp átta ár og fjögur ár í stjórn Strætó.

Í fréttatilkynningu segir Karen Elísabet:

„Undanfarin átta ár hef ég starfað sem bæjarfulltrúi í bæjarstjórn Kópavogs. Á þeim tíma hef ég tekið að mér ýmis trúnaðarstörf í þágu bæjarbúa og aflað mér víðtækrar þekkingar á öllum málaflokkum í rekstri bæjarins,“ segir hún.

„Mér þykir vænt um bæjarfélagið og fólkið sem hér býr, ég vil sjá blómlegt mannlíf ásamt því að bærinn haldi áfram á þeirri vegferð að bæta þjónustu við bæjarbúa. Ég vil leiða lista Sjálfstæðisflokksins í Kópavogi til sigurs næsta vor og tel að reynsla mín og þekking muni nýtast í komandi sveitastjórnarkosningum.“