Íslenskum lögregluyfirvöldum hafa borist fyrirspurnir og erindi vegna hryðjuverkana í Christchurch í síðustu viku, meðal annars frá nýsjálenskum yfirvöldum. Þetta staðfestir Sólberg Svanur Bjarnason, aðstoðaryfirlögregluþjónn hjá alþjóðadeild ríkislögreglustjóra.

„Unnið er að því að kanna ferðir Brentons Tarrrant til Íslands árið 2017. Frekari upplýsingar verða ekki veittar að svo komnu,“ segir meðal annars í svari Sólbergs við fyrirspurn Fréttablaðsins.

Fréttir voru sagðar af því í gær, bæði í hérlendum og erlendum fjölmiðlum að Brenton Tarrant, sem framdi ódæðið í síðustu viku hefði komið til Íslands í Evrópureisu sinni árið 2017.

„Það er hvergi skjól að finna lengur, hvorki á Íslandi, í Póllandi, á Nýja-Sjálandi, í Argentínu eða Úkraínu. Hvergi í heiminum. Ég veit það, ég hef verið þar.“ Þetta stendur í yfirlýsingu mannsins sem myrti 50 manns í mosku í Christchurh á Nýja-Sjálandi á föstudaginn og særði aðra fimmtíu. Yfirlýsinguna sendi hann til forsætisráðherra Nýja-Sjálands rétt áður en hann framdi ódæðið.

Á vef Washington Post er greint frá því að lögregla á Nýja-Sjálandi vinni nú að kortlagningu ferða hans á síðustu árum og leiti að fólki sem hann gæti hafa hitt og átt samskipti við á ferðalögum sínum og nú er ljóst að óskað hefur verið eftir aðstoð alþjóðadeildar ríkislögreglustjóra við kortlagningu á ferð hans hingað.

Ekki liggur fyrir hvort Tarrant var einn að verki eða hvort hann naut aðstoðar við undirbúning árásarinnar, en í yfirlýsingu sinni kveðst Tarrant hafa sótt innblástur til norska hryðju­verka­manns­ins And­ers Breivik og lætur þess getið að hann hafi orðið margs vísari á ferðalögum sínum um Vestur-Evrópu. Frönsku þingkosningarnar hafi valdið honum vonbrigðum. Þá kemur fram að með árásinni hafi hann viljað hefna 11 ára gamallar stúlku sem lést í hryðjuverkaárásinni í Stokkhólmi árið 2017. Haft er eftir móður stúlkunnar í sænskum fjölmiðlum að henni hafi orðið flökurt við tíðindin af árásinni.

Sænska samfélagsmiðlastjarnan PewDiPie hefur einnig þurft að sverja öfgamanninn af sér, en maðurinn sem miðlaði beinni útsendingu af árásinni á internetinu, hvatti fólk til að fylgja stjörnunni á samfélagsmiðlum áður en hann hóf skothríðina.

Í yfirlýsingu sinni fer Tarrant einnig fögrum orðum um Donald Trump, forseta Bandaríkjanna, og segir hann endurfædda sjálfsmynd hvítra. Af yfirlýsingunni að dæma er ljóst að um öfgahægrisinnaðan þjóðernissinna er að ræða en málflutningur hans miðar að því að stöðva þurfi múslima sem séu að taka yfir vestræn samfélög og útrýma hvítu fólki.