Formannafundur ASÍ fordæmir með öllu tilraunir til niðurbrots á skipulagðri verkalýðshreyfingu á Íslandi og varar sterklega við uppgangi gulra stéttarfélaga.

Í ályktuninni sem send var út í dag er kallað eftir því að Samtök atvinnulífsins og Samtök aðila í ferðaþjónustu fordæmi framgöngu Play og sendi út skýr skilaboð um að þessi háttsemi verði ekki liðin á íslenskum vinnumarkaði.

Í ályktuninni er farið yfir einkenni gulra stéttarfélaga og þar segir að þau séu undir áhrifavaldi atvinnurekenda, ýmist beint eða óbeint, sækja sér ekki styrk til heildarsamtaka launafólks heldur standa utan þeirra og gera aldrei ágreining í kjaradeilum.

Þar segir enn fremur að slík félög séu þekkt fyrir að gera lakari kjarasamninga og grafi þannig undan almennum launakjörum í landinu.

„Gríðarlegur munur er á lífskjörum almennings í löndum þar sem skipulögð verkalýðshreyfing hefur verið brotin á bak aftur annars vegar og í löndum þar sem verkalýðshreyfingin stendur styrkum fótum hins vegar. Alþýðusamband Íslands og aðildarfélög þess munu standa hart gegn hvers konar tilraunum til að brjóta á bak skipulagða verkalýðshreyfingu, enda á verkalýðshreyfingin ríkan þátt í þeim lífsgæðum sem almenningur nýtur á Íslandi. Það er fyrir tilstilli verkalýðshreyfingarinnar að vinnandi fólk á rétt til launaðs sumarleyfis og þorri almennings hefur aðgengi að bæði heilbrigðisþjónustu og menntun,“ segir í ályktuninni.

Þau segja að nýjasta dæmi um slíka tilraun séu samningar flugfélagsins Play og hins Íslenska flugstéttarfélags en í ályktuninni segir að samningnum sé ætlað að móta ramma utan um kjör flugfreyja- og flugþjóna hjá flugfélaginu Play. Þau segja að samningarnir kveði á um lakari kjör og réttindi en hafi þekkst á íslenskum vinnumarkaði og segja að enn sé ekki ljóst hvort að samningarnir hafi verið samþykktir.

„Krafan er skýr: að Play gangi til kjarasamninga við það launafólk sem á að vinna samkvæmt þessum kjarasamningum, sá samningur verði lagður í dóm starfsfólks og þar með verði leikreglur á íslenskum vinnumarkaði virtar,“ segir að lokum í ályktuninni.