Það væri vægast sagt kaldhæðnislegt að láta ferðaþjónustuna blæða út skömmu áður en hjólin fara að snúast á ný, segja stjórnendur tíu ferðaþjónustufyrirtækja.

Stjórnendur tíu ferðaþjónustufyrirtækja hafa sent frá sér yfirlýsingu og áskorun til stjórnvalda þar sem þeir segja stór hluti ferðaþjónustufyrirtækja ekki hafa nægar tekur til að halda starfsfólki né ráða inn fólk til að undirbúa ferðasumarið eða stunda markaðssetningu.

Ferðaþjónustan löskuð

Í yfirlýsingu stjórnendanna segir að hætta sé fyrir hendi að þegar ferðamenn fari að streyma aftur til landsins með vorinu, verði ferðaþjónustan of löskuð til að taka á móti þeim.

Samkvæmt þeir er því spáð að ferðamönnum muni fjölga töluvert frá því sem var í fyrra. Ferðamenn muni vilja sækja alla helstu ferðaþjónustu sem í boði er og viðbúið sé að slík þjónusta verði víða ekki til staðar vegna vöntunar á starfsfólki.

„Óvissan og sveiflurnar í ferðaþjónustunni hafa gert það að verkum að fjöldinn allur af reyndu og öflugu starfsfólki er hætt fyrir fullt og allt. Öðrum hefur verið hægt að halda, þrátt fyrir sveiflurnar, með fjölbreyttum úrræðum sem ríkissjóður hefur kostað. En nú hafa allir slíkir styrkir runnið sitt skeið. Janúar má að heita dauður tekjulega séð í ferðaþjónustunni, með 65-70% tekjufalli,“ segir meðal annars í yfirlýsingunni.

Útlitið ekki bjart

Þá segir einnig að útlitið sé ekki bjartara næstu tvö mánuði hið minnsta. „Ekkert fyrirtæki getur staðið undir fastakostnaði og launakostnaði nema hafa tekjur. Áformað er að halda áfram með viðspyrnustyrki. Þeir gagnast samt aðeins minnstu fyrirtækjunum, enda eru þeir að hámarki 2,5 milljónir miðað við 5 starfsmenn. Viðspyrnustyrkir gera lítið fyrir millistór og stór fyrirtæki í ferðaþjónustunni.

Það versta sem getur komið fyrir í aðdraganda ferðasumarsins er að ferðaþjónustufyrirtæki fara að segja fólki upp enn einu sinni í þeirri von að það fáist aftur til starfa þegar birtir yfir - eða að nýtt og óreynt fólk taki við. Hætt er við því að tekjur þjóðarbúsins af komu ferðamanna verði minni en ella.“

Til mikils að vinna

Það sé því til mikils að vinna að tryggja að ferðaþjónustan geti mætt þörfum þeirra ferðamanna sem munu leggja leið sína hingað í sumar og tryggja áframhaldandi gott orðspor fyrir Íslands sem áfangastað.

„Besta leiðin er að framlengja ráðningarstyrkina til að halda samfellu í störfunum. Samt ekki með sama fyrirkomulagi og áður, að fyrirtæki þurfi að segja fólki upp og ráða nýtt af atvinnuleysisskrá,“ segir jafnframt í yfirlýsingunni.

Aðgerðir þola enga bið

Í yfirlýsingunni er lagt til að úrræðið verði framlengt í 3 til 6 mánuði fyrir það starfsfólk sem hefur verið í vinnu á grundvelli þess. Auðvelt sé að koma í veg fyrir misnotkun með því að tengja það við tekjufallið árið 2021 miðað við 2019.

„Aðgerðir þola enga bið og við skorum því á stjórnvöld að bregðast við nú þegar. Með litlar sem engar tekjur geta mörg fyrirtæki ekki staðið undir ráðningarsambandi, greitt laun, launatengd gjöld, rekstur húsnæðis og tækja, afborganir lána og annað sem fylgir rekstri.

Stuðningur ríkisvaldsins og einstaka gusur í komu ferðamanna hafa haldið lífi í atvinnugreininni þau tæpu tvö ár sem faraldurinn hefur geisað,“ segir í lok yfirlýsingarinnar.

Þeir sem kvitta undir yfirlýsinguna eru eftirtaldir;

Davíð Torfi Ólafsson, Íslandshótel

Gunnar Rafn Birgisson Ferðaskrifstofan Atlantik

Hallgrímur Lárusson, Snæland Travel

Helena Vignisdóttir, Hótel Varmaland

Hörður Guðmundsson, Flugfélagið Ernir

Kristófer Oliversson, formaður FHG - Fyrirtækja í hótel og gistiþjónustu

Rannveig Grétarsdóttir, Elding Hvalaskoðun

Steinþór Jónsson, Hótel Keflavík

Þórir Garðarsson, Gray Line Iceland

Þórunn Reynisdóttir, Ferðaskrifstofa Ísland