Karlmaður var í liðinni viku kærður fyrir þrjár líkamsárásir. Fram kemur í tilkynningu frá lögreglunni í Vestmannaeyjum, þar sem árásirnar áttu sér stað, að tvær þeirra teljist minniháttar en í einu tilviki sé um meiriháttar áverka á ræða.

Auk líkamsárásanna er maðurinn kærður fyrir fjölmörg önnur brot eins og hótanir, húsbrot, eignaspjöll, þjófnað, vopnalagabrot og fíkniefnalagabrots. Maðurinn er einnig kærður fyrir ofbeldi og hótanir gagnvart lögreglu og brot gegn valdstjórn fyrir að stinga á fjóra hjólbarða á lögreglubifreið. Segir að með því hafi hann hindrað störf lögreglu og að slíkt sé litið mjög alvarlegum augum. 

Hann var í kjölfarið handtekinn og færður fyrir dómara sem úrskurðaði hann í fjögurra vikna gæsluvarðhald vegna brota á skilorði og annarra ólokinna mála í kerfinu.

Braut hliðarrúðu í annarlegu ástandi

Lögreglan í Vestmannaeyjum sinnti þó einnig öðrum málum í liðinni viku. Síðastliðinn þriðjudag var maður handtekinn eftir að hann braut hliðarrúðu í bíl. Hann var óviðræðuhæfur og í annarlega ástandi þegar hann var handtekinn. Honum var sleppt úr haldi eftir að runnið hafði af honum og hann gefið skýrslu.

Þá var tilkynnt um tvö umferðaróhöpp. Þau áttu bæði sér stað síðdegis síðasta föstudag. Í báðum tilvikum misstu ökumenn stjórn á bifreiðum sínum vegna hálku, en mikil ofankoma var þegar óhöppin voru. Annað atvikið átti sér stað á Hamarsvegi þar sem ökumaðurinn missti stjórn á bifreiðinni og lenti utan vega með þeim afleiðingum að bifreiðin valt og endaði á hvolfi. Í hinu tilvikinu missti ökumaðurinn stjórn á bifreiðinni þannig að hún rann á aðra bifreið á gatnamótum Hlíðarvegar og Flata. Ekki var um alvarleg meiðsl í þessum óhöppum en nokkuð tjón varð á ökutækjum.

Þá hafði lögreglan í nógu að snúast í byrjun síðustu viku vegna óveðurs sem gekk yfir Eyjarnar. Þá var lögreglunni tilkynnt um fjögur tilvik þar sem girðingar og drasl voru að fjúka. Engin slys urðu á fólki í þessu óveðri.

Tilkynningu lögreglunnar má sjá hér að neðan.