Ísorka hefur kært útboð á uppsetningu hleðslustöðva fyrir rafbíla í Reykjavík til kærunefndar útboðsmála. Farið er fram á að felld verði úr gildi ákvörðun Umhverfis- og skipulagssviðs Reykjavíkurborgar um að ganga að tilboði Orku náttúrunnar, ON. Málið er nú til meðferðar en kærunefndin komst að þeirri niðurstöðu í gær að samningaviðræður yrðu ekki stöðvaðar, endanleg ákvörðun liggur ekki fyrir.

Málið má rekja til samkomulags Reykjavíkurborgar, Orkuveitu Reykjavíkur, sem er eigandi ON, og Veitna, systurfyrirtækis ON, sem undirritað var í fyrra um að koma upp 71 hleðslustöð víðs vegar um borgina til að þjóna rafbílaeigendum sem ekki hafa bílastæði á eigin lóð.

Tilboðin í framkvæmdina voru opnuð í ágúst, kostnaðaráætlunin var upp á alls 10,8 milljónir. Knýr ehf. átti hæsta tilboðið, rúmar 227 milljónir, þar á eftir koma Bílahleðslan ehf. með 85 milljónir og Ísorka ehf. með 25,5 milljónir. ON bauðst hins vegar til að greiða borginni 113 þúsund krónur fyrir að setja upp hleðslustöðvarnar.

Kæra Ísorku byggir á skilmálum útboðsins um að bjóðendur uppfylli reglugerð um raforkuviðskipti á opnunardegi útboðs. Sama dag og útboðin voru opnuð, 20. ágúst, komst Orkustofnun að þeirri niðurstöðu að ON bryti í bága við þá sömu reglugerð.

Kæran byggir einnig á að Samkeppniseftirlitið hafi hafið formlega rannsókn á starfsháttum ON varðandi sölu, uppsetningu og þjónustu á hleðslustöðvum og hleðslum fyrir rafbíla. Fer Ísorka fram á að ON verði vísað frá þátttöku í útboðinu vegna þess.

Fram kemur í bréfi borgarinnar til Ísorku að ON sé að bregðast við úrskurði Orkustofnunar og hafi beðið um endurupptöku. Í kjölfar þessa bréfs var tilkynnt að borgin hygðist ganga að tilboði ON.

Berglind Rán Ólafsdóttir, framkvæmdastýra ON, segir að ástæðan fyrir því að tilboð ON sé svo lágt sé vegna þess að gert hafi verið ráð fyrir slíkum möguleika í útboðinu. „Við erum að borga litla upphæð fyrir að fá aðgang að landinu til að setja upp stöðvar og selja rafmagn á hleðslustöðvarnar.“ Kærunefnd útboðsmála hafi ákveðið að ekki sé ástæða til þess að stöðva samningsgerð þar sem verkefnið sé ekki útboðsskylt. Þá eigi ON eftir að kaupa inn stöðvarnar og verði það gert eftir þeim reglum sem við eiga.

Berglind tekur fram að verkefnið sé mjög mikilvægt skref í innviðauppbyggingu fyrir rafbíla. „Það er þröskuldur fyrir orkuskiptin að heimili geti skipt út bensínbíl fyrir rafbíl, það eru svo margir sem að búa þannig að þeir eru ekki með stæði,“ segir hún. „Með þessu geta svokallaðir landlausir í hverfunum hlaðið bílinn á nóttunni, þetta er mjög mikilvægt verkefni.“