Félag íslenskra bifreiðaeigenda (FÍB) hefur sent Fjármálaeftirlitinu kvörtun vegna hagsmunagæslu Samtaka fjármálafyrirtækja (SFF) fyrir hönd vátryggingafélaganna. Þetta staðfestir Runólfur Ólafsson, framkvæmdastjóri FÍB.

Upphaf málsins megi rekja til þess að FÍB benti í grein á að tryggingafélögin, Sjóvá, VÍS, TM og Vörður, stæðu fyrir okri á bílatryggingum. Framkvæmdastjóri SFF hafi gripið til varna í svargrein sem birtist á heimasíðu samtakanna, þar sem bornar voru brigður á málflutning FÍB og iðgjaldahækkunin skýrð með tilliti til ýmissa þátta. Félagið telur að með þessu sé verið að brjóta á neytendum og hagsmunum þeirra.

Runólfur vísar meðal annars í heimasíðu SFF þar sem segir: „SFF er óheimilt að fara með opinbert fyrirsvar varðandi verðlagningu og þjónustu aðildarfélaga sinna og getur slíkt falið í sér sjálfstætt brot á samkeppnislögum. Tekur þetta m.a. til umræðu á opinberum vettvangi, um verð og verðbreytingar aðildarfélaga og um kröfur viðskiptavina þeirra um lægra verð eða bætt viðskiptakjör.“

FÍB telur að Katrín Júlíusdóttir, fyrir hönd Samtaka fjármálafyrirtækja, hafi brotið eigin reglur með inngripi sínu. Málið gæti endað á borði Samkeppniseftirlitsins.

Fréttablaðið náði ekki í Katrínu Júlíusdóttur eftir að FÍB ákvað að senda kvörtunina. Áður hafði blaðið spurt hvort skrif hennar væru viðeigandi og svaraði Katrín að hún hefði með skrifum sínum verið að horfa á starfsumhverfið. Hún hefði verið að fjalla um vátryggingamarkaðinn en ekki félögin.