Kæmi á ó­vart ef á­kært væri fyrir til­raun til hryðju­verks

Ekki hefur verið gefin út á­kæra í hryðju­verka­málinu, en gæslu­varð­hald á að renna út þann 8. desember. Sveinn Andri Sveins­son, lög­maður annars sak­borningsins segir að það myndi sæta furðu ef gefin verði út á­kæra fyrir til­raun til hryðju­verka.

Í síðustu viku sagði héraðssaksóknari að rannsókn málsins væri lokið. Málið er nú hjá saksóknara sem mun taka afstöðu til þess hvort mennirnir verði ákærðir.

Sveinn segir að hann hafi ekkert heyrt frá á­kæru­valdinu um á­kæru í málinu. Hann segir að mögu­lega verði gæslu­varð­haldið fram­lengt.

„Þeir gætu haft þá inni til fjór­tánda desember, þá eru tólf vikur liðnar. Þeir þurfa að gefa út á­kæru fyrir tólftu vikuna, svo gætu þeir mögu­lega fram­lengt gæslu­varð­haldið ef á­kæran er þess efnis,“ segir Sveinn.

Sveinn segir erfitt að segja til um fram­haldið og hvort á­kæru­valdið muni gefa út á­kæru.

„Það er ó­mögu­legt að segja. Það er erfitt að ráða í það hvað á­kæru­valdið ætlar að gera. Það myndi sæta furðu ef þeir gefa út á­kæru fyrir til­raun til hryðju­verka,“ segir Sveinn og bætir við að vegir á­kæru­valdsins séu ó­rann­sakan­legir. „Við verðum bara að bíða og sjá,“ segir Sveinn.

Hann segir að hann sé í reglu­legu sam­bandi við um­bjóðanda sinn.

„Við tölum reglu­lega. Hann er að taka þessu öllu af merki­legri yfir­vegun. Það er búið að setja hans líf á hliðina, þeirra tveggja,“ segir Sveinn.