Innlent

Jónas hættir sem for­maður Sjó­manna­fé­lagsins

Jónas Garðars­son segir að nú þegar á­hlaupi á Sjó­manna­fé­lag Ís­lands hafi verið hrundið hafi hann á­kveðið að stíga til hliðar sem for­maður með eigin hag, fjöl­skyldu sinnar og fé­lagsins að leiðar­ljósi.

Jónas Garðarsson hefur ákveðið að stíga til hliðar sem formaður Sjómannafélags Íslands sjálfs sín, fjölskyldu sinnar og félagsins vegna. Hann vonast með þessu til að auðvelda sáttaferlið hjá félaginu. Fréttablaðið/Hari

Jónas Garðarsson hefur ákveðið að hætta sem formaður Sjómannafélags Íslands. Þetta segist hann geri núna, þegar áhlaupi á félagið hafi verið hrundið, með eigin hag, fjölskyldu sinnar og félagsins að leiðarljósi.

Jónas segir í yfirlýsingu að í átökunum um yfirráð í félaginu hafi persóna hans verið dregin sérstaklega í sviðsljósið.

„Minnst af þeirri umfjöllun hefur snúist um gagnrýni á störf mín fyrir félagið heldur annars vegar um launakostnað félagsins vegna mín, sem sagður var um þrefalt hærri en raun er á, og hins vegar upprifjun á sorglegum atburðum í einkalífi mínu.

Svo langt hefur verið gengið að flétta með grímulausum hætti eiginkonu minni og jafnvel börnum inn í þessa upprifjun fjölmiðlanna. Frammistaða uppkominna barna minna í atvinnulífinu hefur jafnvel verið gerð tortryggileg,“ segir Jónas og bætir við að „áhlaupshópurinn“ hafi í honum fundið „snöggan blett á félaginu og nýtti sér hann út í ystu æsar. Það gerði hann þrátt fyrir að ég hafi strax síðastliðið sumar gefið út yfirlýsingu um að ég myndi ekki bjóða mig fram til áframhaldandi formennsku í félaginu.“

Áhlaupinu hrundið

Jónas segir jafnframt í yfirlýsingunni að áhlaupi sem ætlað var að yfirtaka félagið hafi verið hrundið og að í þeirri varnarbaráttu hafi í einu og öllu verið farið að lögum félagsins.

„Eflaust eru skiptar skoðanir um einhver ákvæði í lögunum. Til stendur að skipa sérstaka nefnd til þess að endurskoða lögin með heildstæðum hætti og leggja tillögur sínar fyrir aðalfund árið 2019,“ segir Jónas og heldur áfram:

„Í atlögunni sem gerð var að félaginu var það borið þungum sökum um vinnubrögð. Flestar þeirra ásakana voru beinlínis rangar. Þeim var slegið hverri á fætur annarri upp í þeim fjölmiðlum sem mest lögðu sig fram í umfjöllun um deilur innan félagsins. Minni áhugi hefur verið á að leiðrétta þær rangfærslur jafnóðum og sýnt var fram á upplognar sakir. Þannig hefur áhlaupsliðinu tekist að sá frækornum efasemda um heiðarleika og heilbrigði í rekstri  Sjómannafélags Íslands.“

Tilbúinn til að leggja hönd á plóg

Jónas segir einnig að nýrri forystu Sjómannafélags Íslands bíði það mikilvæga verkefni að sameina á ný krafta sjómanna og segist tilbúinn til þess að leggja þar hönd á plóg verði þess óskað.

„Það verður verkefni nýrrar forystu að sameina á nýjan leik þann styrk sem felst í víðtækri samstöðu innan Sjómannafélags Íslands og lagt hefur grunn að þeim mikla árangri sem náðst hefur á undanförnum árum. Sú vinna þolir enga bið.

Til þess að flýta fyrir því ferli hef ég ákveðið að stíga til hliðar sem formaður félagsins. Ég óska þeim sem við keflinu taka farsældar í gríðarlega mikilvægum störfum sínum á næstu mánuðum. Ég mun að sjálfsögðu eins og svo fjölmargir aðrir félagsmenn leggja þar hönd á plóg verði eftir því óskað.

Ég tek þessa ákvörðun með eigin hag, fjölskyldu minnar og félagsins að leiðarljósi og vona að hún muni gera sáttaferlið innan Sjómannafélags Íslands auðveldara en ella.“

Athugasemdir

Auglýsing
Auglýsing

Tengdar fréttir

Innlent

Jónas hafnar á­sökunum um klæki og fanta­skap

Innlent

Jónas spyr hvað liggi að baki „brjál­æði“ Heið­veigar

Innlent

Úrskurður kjörstjórnar SÍ „ólýðræðislegt ofbeldi“

Auglýsing

Nýjast

Gul stormviðvörun á morgun

Lægri fast­eigna­skattur og hærri syst­kina­af­sláttur

Vegagerðin vill Þ-H þrátt fyrir nýja greiningu

Varð fyrir 500 kílóa stálbita

„Hefði orðið upplausn í Bretlandi“

Stóð af sér tillögu um vantraust með góðum meirihluta

Auglýsing