Jón Þór Ólafsson, þingmaður Pírata og formaður stjórnskipunar- og eftirlitsnefndar Alþingis, mun ekki gefa kost á sér í næstu alþingiskosningum. Hann tilkynnti um ákvörðun sína í dag, samhliða því að opnað var fyrir skráningar í prófkjör Pírata. Þetta kemur fram í tilkynningi frá flokknum.

„Markmið mitt var alltaf tryggja sjálfbærni Pírata, og í dag er hreyfingin sterkari en nokkru sinni fyrr. Það er mikill meðbyr með flokknum, grasrótin er öflug, starfsfólkið okkar er afburðahæft, þingflokkurinn hefur aldrei verið samheldnari og þau sem bjóða sig fram aftur kunna til verka. Píratar eru því svo sannarlega sjálfbærir og þar sem ég er ekki lengur nauðsynlegur í framlínuna mun ég aftur leita í friðinn utan þingsins í stað þess að leita endurkjörs,“ segir Jón Þór í pistli sem hann sendi frá sér í morgun.

Meðfram þingstörfunum og að þeim loknum hyggst Jón Þór verja tíma sínum í stuðning við næstu kynslóð frambjóðenda og þingmanna.

„Eins og nýleg rannsókn Stefaníu Óskarsdóttur og Ómars H. Kristmundssonar sýnir eru þingmenn yfirleitt lengi að læra á starfið, sem er einfaldlega sóun. Sóun á tíma, peningum og starfskröftum. Og umfram allt sóun á tækifærum til að vinna að framgöngu stefnumála Pírata.“

Helgi Hrafn Gunnarsson og Smári McCarthy, þingmenn Pírata tilkynntu einnig í haust að þeir myndu ekki bjóða sig fram aftur.