„Mér ofbýður algjörlega þessi hamagangur og vægðarlausu svipugöng sem Dagur verður nú fyrir útaf þessu braggamáli,“ skrifar Jón Gnarr, grínisti og fyrrverandi borgarstjóri, í færslu á Facebook síðu sinni. Hann segir að vandinn sé kerfisbundinn.

Dagur B. Eggertsson hefur á dögunum svarað fyrir framúrkeyrslu við framkvæmdir á bragganum í Nauthólsvík, sem hefur verið í kastljósi fjölmiðla frá því í sumar. Fyrir helgi birtist skýrsla innri endurskoðunar Reykjavíkurborgar um framkvæmdirnar, þar sem fram kemur að lög og reglur voru ítrekað brotnar í ferlinu. Dagur hefur sagt í fjölmiðlum að vandinn sé fyrst og fremst sá að kerfið hafi brugðist og að enginn hafi verið látinn vita af hinni miklu framúrkeyrslu.

Jón og Dagur voru saman í meirihluta í borgarstjórn á borgarstjórnartímum þess fyrrnefnda. „Ég hef ekki lesið þessa skýrslu, ég hef lesið um hana en ég þekki þetta kerfi af eigin raun og þekki flestar persónur og leikendur. Hvorki Dagur né Hrólfur eru vondir, spilltir eða heimskir. Langt í frá. Þetta er kerfislægur vandi, það vita það allir sem vilja,“ skrifar Jón. 

Jón deilir jafnframt á fréttaflutning af málinu, og segir að það sé ömurlegt að „við séum á svona sjoppulegum og vondum stað sem samfélag fólks og ég spyr mig daglega hver sé eiginlega tilgangurinn með svona upphlaupi eða aðför eða hvern andskotann maður á að kalla svona“.

Hann fjallar jafnframt um það sem hann kallar „landlægan ruddaskap og villimennsku“ og að það sé ein helsta ástæðan fyrir því hvað fólk er „tregt til að þora að skipta sér af stjórnmálum og eina fólkið sem virðist þrífast þarna eru einhverjir fárveikir alkóhólistar,“ en þar virðist grínistinn skjóta föstum skotum að Klaustursþingmönnunum svokölluðu.

Borgarstjórinn fyrrverandi ver eftirrennarann sinn áfram og segir það ömurlegt að horfa upp á fólk og hópa að nýta sér persónulegar aðstæður fólks til að koma á það höggi. „ Ein helsta ástæða þess að Dagur hefur átt í erfiðleikum með að svara fyrir þetta er að hann hefur verið að glíma við erfiðan sjúkdóm og er tiltölulega nýkominn úr veikindaleyfi,“ skrifar Jón.

Að lokum óskar Jón Facebook-vinum sínum gleðilegra jóla og segist vonast eftir „heilbrigðari stjórnmál[um] og aðeins uppbyggilegri umræðu á nýju ári“.

Færsla Jóns í heild sinni:

Ég verð bara að segja að mér ofbýður algjörlega þessi hamagangur og vægðarlausu svipugöng sem Dagur verður nú fyrir útaf þessu braggamáli. Það er velþekkt að opinberar framkvæmdir fara yfirleitt frammúr áætlun. Í 90% tilfella, einsog sýnt hefur verið fram á. Það er ekki gott. En það er yfirleitt ekki við spillingu eða vanhæfni fólks að sakast heldur er þetta kerfislægur vandi, einsog í svo mörgu hér á landi, þeas við erum með svo stjarnfræðilega lélegt regluverk að það bara býður uppá svona klúður. 

Mér finnst bara ömurlegt að við séum á svona sjoppulegum og vondum stað sem samfélag fólks og ég spyr mig daglega hver sé eiginlega tilgangurinn með svona upphlaupi eða aðför eða hvern andskotann maður á að kalla svona. Daglega birtast nú fyrirsagnir, í hreinlega öllum fjölmiðlum, að einhver segi að honum finnist að Dagur eigi að segja af sér útaf þessu. Allt er þetta fólk og fyrirbæri sem er löngu ljóst að eiga sér enga ósk heitari en að hann einmitt segi af sér. Flestir eru pólitískir andstæðingar hans. Meira að segja Vigdís Hauksdóttir fékk fyrirsögn á RÚV um daginn. Hver er eiginlega í alvöru að pæla í því hvað henni finnst? Hún er td. ekki enn búin að svara því hvort formaðurinn hennar og þrír aðrir meðlimir flokks hennar eigi að segja af sér þingmennsku útaf yfirgengilegu fylleríis-rugli.

Ég hef ekki lesið þessa skýrslu, ég hef lesið um hana en ég þekki þetta kerfi af eigin raun og þekki flestar persónur og leikendur. Hvorki Dagur né Hrólfur eru vondir, spilltir eða heimskir. Langt í frá. Þetta er kerfislægur vandi, það vita það allir sem vilja. Þeir sem ekki skilja það hafa annað hvort ekki kynnt sér málið eða hreinlega þykjast ekki vita það til að ná einhverju fram sem þeir vilja. Munum það að enginn er eins blindur og sá sem vill ekki sjá. Það má hafa allskonar við þetta allt að athuga en það réttlætir ekki miskunarleysi.

Mér finnst líka ömurlegt að horfa uppá þegar fólk og hópar eru að nýta sér persónulegar aðstæður fólks til að koma á það höggi. Ein helsta ástæða þess að Dagur hefur átt í erfiðleikum með að svara fyrir þetta er að hann hefur verið að glíma við erfiðan sjúkdóm og er tiltölulega nýkominn úr veikindaleyfi. Mér fannst því soldið sérstakt, í korterslöngu Kastjósviðtali, sem er fyrsta viðtalið við borgarstjóra í langan tíma er ekki vikið einu orði að veikindum hans. Á öllum sviðum samfélagsins er það þetta sem skiptir mestu máli og ef fólk er að ganga í gegnum veikindi þá á það rétt á stuðningi og umhyggju annara. En afhverju ekki ef fólk er að vinna í stjórnmálum ? Það er ekkert sem réttlætir það að láta eins og veikt fólk sé ekki veikt. Og þarna erum við svo mikið sem samfélag og það er bara ekki gott. Ef það er engin meðlíðan þá verður þetta allt bara innantómt og þreytandi röfl.

Ég held að þessi landlægi ruddaskapur og villimennska sé ein helsta ástæða þess hvað fólk er tregt til að þora að skipta sér af stjórnmálum og eina fólkið sem virðist þrífast þarna eru einhverjir fárveikir alkóhólistar. 

Annars óska ég öllum gleðilegra jóla pg vona að við getum fengið heilbrigðari stjórnmál og aðeins uppbyggilegri umræðu á nýju ári