Rósa Elísabet Erlendsdóttir er afar ósátt út í sóknarnefnd Heydalakirkju í Breiðdal eftir að tré sem stóð við hliðina á leiði frænda hennar var sagað niður án þess að fjölskylda hennar hefði neitt um það að segja. Austurfrétt greinir frá.
„Við erum bæði sorgmædd og reið og þetta eiginlega búið að eyðileggja jólin fyrir fjölskyldunni,“ segir Rósa.
Rósa greindi frá málinu á samfélagsmiðlum og hefur fjöldi fólks tekur undir gagnrýnina og telja að sóknarnefndin hafi staðið mjög illa að snyrtingu kirkjugarðsins í sumar. Þökulagt hafi verið yfir stór svæði, tré og hríslur fjarlægðar og þá fannst einn kross brotinn í garðinum. Rósa vill meina að um sé að ræða skemmdarverk á leiðum fólks.
„Við fjölskyldan höfum fyrir venju að heimsækja tvisvar á ári, votta virðingu okkar, snyrta og slíkt. Nú komum við að og það búið að saga niður tré sem pabbi setti niður hjá leiði bróður síns og móður. Það var búið að þökuleggja yfir blóm á öðrum leiðum í garðinum og allt án þess að hafa neitt samband við ættingja. Þetta eru alveg hræðilegar meðfarir,“ segir hún.
Við erum bæði sorgmædd og reið og þetta eiginlega búið að eyðileggja jólin fyrir fjölskyldunni.
Að sögn sóknarnefndar Heydalakirkju var garðurinn snyrtur af sjálfboðaliðum seint í sumar enda hafi verið mikil þörf á að hreinsa hann. Það hafi ekki verið ætlunin að skemma neitt en ákvörðun hafi verið tekin um að fjarlægja illa farin tré og halda í fjölærar plöntur. Sóknarnefndin segir það hafa verið ómögulegt að hafa samband við alla ættingja hinna látnu því hlaupi á hundruðum.
Nefndin hefur beðist afsökunar á framferðinu og lofað umbótum en Rósa gefur þó lítið fyrir afsökunarbeiðnina.
„Heldur þetta fólk virkilega að þessi hálfsöguðu tré muni ná sér að nýju eða að blóm sem lifað hafa lengi á leiðum rífi sig gegnum þökur? Það er varla að fara að gerast og mér er ekki runnin reiðin yfir að ekki skyldi vera haft beint samband við aðstandendur áður en farið var í svona lagað,“ segir hún í samtali við Austurfrétt.
