Banda­ríska lyfja­fyrir­tælið John­son & John­son hefur verið dæmt til að greiða manni átta milljarða dollara í bætur fyrir að upp­lýsa neyt­endur ekki nægi­lega vel um auka­verkanir lyfsins Risper­dal af því er kemur fram í frétt BBC um málið. Upp­hæðin sam­svarar um eitt þúsund milljarða króna.

Nicholas Murray byrjaði að taka lyfið árið 2003, þegar hann var níu ára, eftir að hann hafði greinst á ein­hverfurófinu en lyfið er ætlað þeim sem eru með geð­klofa eða geð­hvarfa­sýki. Eftir að Murray hóf að taka lyfin fóru að vaxa á hann brjóst en hann hafði ekki verið upp­lýstur um að lyfin gæti haft þær auka­verkanir.

Lyfið Risperdal er ætlað þeim sem eru með geðklofa eða geðhvarfasýki.
Fréttablaðið/Getty

Fjöldi lög­sókna

Árið 2015 var John­son & John­son dæmt til að greiða Murray 1,75 milljón dollara en á­frýjunar­dóm­stólar lækkuðu upp­hæðina í 680 þúsund dollara, eða 85 milljón ís­lenskra króna. Fyrir­tækið mun koma til með að á­frýja málinu og eru þau viss um að málinu verði vísað frá.

Fyrir­tækið var fyrr á árinu dæmt til að greiða 572 milljón dollara, eða rúm­lega 71 milljarð ís­lenskra króna, fyrir hlut­verk þeirra í að ýta undir ópíóða­far­aldur í Okla­homa-fylki Banda­ríkjanna. Þar að auki á lyfja­risinn von á á­kærum eftir að af­hjúpað var að stjórn­endur fyrir­tækisins væru kunnugt um að leifar af asbesti væri að finna í púður­vörum þeirra.