Jóhann Steinar Ingimundarson varð í gær nýr formaður UMFÍ. Í tilkynningu kemur fram að hann sé sjálfkjörinn og að hann taki við af Hauki Valtýssyni, sem gegnt hefur embætti formanns frá árinu 2015.
Jóhann Steinar hefur tengt ungmennafélaginu Stjörnunni í Garðabæ frá barnæsku og hefur verið formaður félagsins. Hann hefur setið í stjórn UMFÍ síðastliðin fjögur ár.
Kosning stjórnar UMFÍ fór fram á sambandsþingi UMFÍ, sem fram fór á Húsavík í gær. Nokkrar breytingar urðu á stjórn UMFÍ. Málfríður Sigurhansdóttir kom ný inn í stjórnina fyrir hönd Íþróttabandalags Reykjavíkur (ÍBR). Aðrir í stjórn UMFÍ voru kosin þau Gunnar Þór Gestsson frá Ungmennasambandi Skagafjarðar (UMSS), Ragnheiður Högnadóttir frá Ungmennasambandi Vestur-Skaftafellssýslu (USVS), Guðmundur Sigurbergsson fyrir hönd Ungmennasambands Kjalarnesþings (UMSK), Gunnar Gunnarsson fyrir Ungmenna- og íþróttasamband Austurlands (UÍA) og Sigurður Óskar Jónsson frá Ungmennasambandinu Úlfljóti (USÚ).
Í varastjórn voru kosin þau Hallbera Eiríksdóttir frá Ungmennasambandi Borgarfjarðar (UMSB), Lárus B. Lárusson frá Ungmennasambandi Kjalarnesþings (UMSK), Gissur Jónsson frá Héraðssambandinu Skarphéðni (HSK) og Guðmunda Ólafsdóttir frá Íþróttabandalagi Akraness (ÍA).
Þær Málfríður og Guðmunda koma báðar frá íþróttabandalögum sem fengu aðild að UMFÍ á sambandsþingi UMFÍ árið 2019.
UMFÍ er landssamband ungmennafélaga á Íslandi. Innan þess eru 450 félög, þar af nær öll íþróttafélög landsins og eru iðkendur rúmlega hundrað þúsund.
