Embætti héraðssaksóknara hefur fellt niður sakamál á hendur Samherja en hefur ekki lokið rannsókn sinni á þeim málum sem tengjast máli Samherja í Namibíu. Í samtali við Fréttablaðið staðfestir Ólafur Þór Hauksson, héraðssaksóknari, að skattamálin hafi verið flutt yfir til Skattsins. Samkvæmt samkomulagi við Skattinn greiðir Samherji 230 milljón krónur í sekt en auk þess leggur Skatturinn endurálagningu á félög Samherja vegna rekstraráranna 2012 til 2018.
Sáttirnar mill Samherja og Skattsins fela í sér að Samherji greiði viðbótarskatt vegna staðgreiðslu opinberra gjalda og tryggingargjalds af sjómönnum á erlendum skipum. Samkvæmt tilkynningu Samherja var sáttin gerð að frumkvæði Skattsins. Samherji greiðir um 213 milljónir króna, auk dráttarvaxta í endurálagningu og 15 milljón króna sektar.
Í tilkynningu frá Samherja segir að héraðssaksóknari hafi fellt niður mál á hendur félaga tengdum Samherja og starfsfólki þeirra. Með því telur Samherji að að hvorki starfsmenn né stjórnendur Samherja hafi gerst sekir um refsiverð brot.
Ólafur Þór Hauksson, héraðssaksóknari segir að embættið sé enn með málefni Samherja í Namibíu til rannsóknar. Þar er útgerðarfélaginu gefið að sök að hafa staðið í mútugreiðslum og peningaþvætti. Sú rannsókn sé vel á veg komin.
„Namibíu-rannsóknin er á sama stigi og áður og er vinnan hérna heima langt á veg komin. Við erum með réttarbeiðnir útistandandi, þar með út í Namibíu þar sem við erum ekki búin að fá hana framkvæmda og við erum að ýta á það. Tímafaktorinn liggur svo lítið í hendi þeirra yfirvalda sem við erum að leita eftir aðstoð hjá,“ segir Ólafur og bætir við að Covid-19 faraldurinn hafi spilað inn í rannsókn málsins, sem hófst árið 2019.
