Innlent

Já­eindaskanninn ó­virkur í viku vegna raf­magns­bilunar

Bilun í háspennulínu, sem varð fyrir um hálfum mánuði, setti starfsemi jáeindaskannans á Landspítalanum í uppnám.

Jáeindaskanninn á Landspítalanum gerir það að verkum að Íslendingar þurfa síður að fara til Danmerkur í krabbameinsrannsóknir. Fréttablaðið/Eyþór Árnason

Rafmagnsbilun sem varð í miðbæ Reykjavíkur 27. september síðastliðinn gerði það að verkum að jáeindaskanninn, sem tekinn var í notkun um miðjan september, varð óstarfhæfur í um viku. Hann er rétt að komast í fulla notkun aftur. Þetta staðfestir Pétur H. Hannesson, yfirlæknir röntgendeildar.

Pétur segir að þegar rafmagnið hafi farið þá hafi varaaflstöðvar á spítalanum farið í gang. Loftræstikerfið hafi truflast vegna bilunarinnar og valdið breyttum loftþrýstingi í framleiðslukerfunum fyrir jáeindaskannann, en á spítalanum er framleitt geislavirkt efni sem notað er við rannsóknirnar. „Þetta eru allt herbergi og klefar sem eru gerðir eftir ákveðnum klössum í hreinlæti. Þegar loftræstikerfið bilar þá þarf að sterilísera allt saman upp á nýtt,“ útskýrir Pétur. Rækta þurfi sýni úr loftinu – til að leita að bakteríum - og þegar þær ræktanir komi neikvæðar út sé hægt að byrja aftur. „Þetta er viðkvæm starfsemi,“ segir Pétur.

Starfsemi jáeindaskannans er hátæknileg. Fréttablaðið/Eyþór Árnason

Landspítalinn réðist í ráðstafanir vegna þessa, til að koma í veg fyrir að þetta geti endurtekið sig. Pétur segir að svokallaðir ufsar hafi verið settir á loftræstikerfið. Það séu rafhlöður sem grípi inn í, verði rafmagnslaust. „Það er búið að setja það upp.“ Aðspurður segir hann að sá kostnaður hafi verið smávægilegur í stóra samhenginu.

Tvær vikur eru frá því rafmagnsleysið varð. Við það þurfti að stöðva rannsóknir, eins og áður segir. Áður en rafhlöðurnar voru settar í loftræstikerfið hafi þó verið hægt að framkvæma nokkrar rannsóknir.

Pétri er ekki kunnugt um að senda hafi þurft sjúklinga til Danmerkur í jáeindaskanna, vegna þessarar uppákomu. Þangað fóru Íslendingar áður en skanninn var tekinn í notkun hér. Hann segir að sú staða geti þó alveg komið upp, verði hlé á framleiðslunni eða ef rannsókn á sjúklingi þoli enga bið.

Aðspurður segir hann að skanninn, sem var tekinn í notkun fyrir tæpum mánuði, hafi þegar skilað af sér rannsóknum á fáum tugum sjúklinga.

Athugasemdir

Auglýsing
Auglýsing

Tengdar fréttir

Innlent

Mikilvægt að við­mið jóla­sveina um hver sé „góður“ séu skýr

Innlent

Stjórn Sam­fylkingarinnar fundar síð­degis

Innlent

Aldrei góð hug­mynd að gefa dýr í jóla­gjöf

Auglýsing

Nýjast

Minnkun bílasölu í Kína ekki meiri í 7 ár

Snýr Toyota MR2 aftur með hjálp Subaru?

Al­var­legt mál ef að starfi nefndar „er tor­veldað“

Svar­leysið sendi vond skila­boð til sam­fé­lagsins

Árásarmaðurinn í Strassborg enn á flótta

Fundi frestað því hvorki náðist í Gunnar Braga né Sig­­mund

Auglýsing