Fjölmenn mótmæli hafa staðið yfir víðs vegar í Kína síðustu daga og hafa þau ekki verið jafn útbreidd í landinu í meira en þrjá áratugi. Mótmælin fara nú fram í að minnsta kosti sex kínverskum stórborgum og hafa sumir kallað eftir afsögn Xi Jinping forseta.

Geir Sigurðsson, prófessor í kínverskum fræðum við Háskóla Íslands, segir að aðsóknin í kínverskunám hafi dregist saman á undanförnum árum og grunar hann að stjórnarstefna Xi Jinping hafi orðið til þess að Kína sé ekki eins aðlaðandi land og það var áður.

„Ef það verður einhver útbreiðsla á þessum mótmælum þá hugsar fólk sig náttúrlega tvisvar um áður en það fer.

Ég gæti líka ímyndað mér að þeir sem fara út myndu síður vilja fara í þessar stórborgir eins og Peking og Sjanghaí og færu frekar í minni héraðsborgir. Svo eru örugglega fleiri sem vilja bara fara til Taívan,“ segir Geir.

Hann bætir við að stjórnvöld hafi lýst því yfir að aflétta ætti sóttvarnaaðgerðum 11. nóvember síðastliðinn í tuttugu skrefum en svo hafi ekkert orðið úr því. „Það eru svo margir óvissuþættir sem við þurfum að glíma við núna.“

Geir Sigurðsson, prófessor í kínverskum fræðum.
Mynd/Kristinn Ingvarsson

Konfúsíusarstofnunin Norðurljós var stofnuð árið 2008 og hefur síðan þá boðið upp á nám í kínverskum fræðum við Háskóla Íslands. Tilgangur stofnunarinnar er fyrst og fremst kínverskukennsla og stuðlar hún einnig að fræðslu um tungu, menningu og samfélag í Kína.

Námið felur í sér ársdvöl í Kína áður en nemendur ljúka þriggja ára BA-námi í kínverskum fræðum. Eftir að Covid-19 skall á var sá möguleiki ekki lengur til staðar en nú í haust byrjuðu kínversk yfirvöld að hleypa námsmönnum aftur inn í landið. Þrátt fyrir það fór enginn íslenskur kínverskunemi til Kína þetta árið.

Magnús Björnsson, forstöðumaður Konfúsíusarstofnunarinnar Norðurljósa, tekur í sama streng og segir að óvissan og svikin loforð eigi stóran þátt í því að mótmælin hafi komið svona skyndilega. Almenningur í Kína hafi gert sér ákveðnar væntingar um að stjórnvöld myndu aflétta sóttvarnareglum eftir flokksþing kommúnistaflokksins en það var ekki gert og sér fólk nú ekki fram á neinn endi.

Íslenskir námsmenn í kínverskum fræðum geta nú sótt um skiptinámsdvöl í Kína fyrir næsta skólaár en spurningin er hvert ferðinni verður heitið.

„Þeir nemendur sem vilja vera í kínversku tungumálaumhverfi gætu valið Taívan. En flestir vilja náttúrlega fara til meginlandsins. En ef það verður engin breyting á þessari „núll-stefnu“ stjórnvalda þá gæti það breytt ferðaáætlunum námsmanna,“ segir Magnús.