Ís­lenskar mæðgur stranda­glópar eftir stóra skurð­að­gerð í Helsinki

Móðir sem fór með dóttur sína í skurð­að­gerð á höfði til Helsinki festist á flug­vallar­hóteli þar sem fluginu þeirra heim til Ís­lands var af­lýst vegna ó­veðurs. Engin frá Icelandair setti sig í sam­band við mæðgurnar, sem komast vonandi heim á morgun í tæka tíð fyrir sauma­töku á Ís­landi.

„Við fórum til Helsinki vegna þess að dóttir mín þurfti að fara í að­gerð sem var ekki hægt að fram­kvæma á Ís­landi. Hún fékk að fara út af spítalanum því við áttum flug heim ní­tjánda desember, sem er síðan frestað vegna veðurs,“ segir Guð­rún Hulda Foss­dal, sem er föst á hótel­her­bergi í Helsinki á­samt móður sinni og dóttur.

„Fluginu okkar var svo frestað aftur í gær og ég fæ þær upp­lýsingar að næsta flug til Ís­lands sé full­bókað,“ segir Guð­rún, en þær mæðgur á­samt stórum hóp af Ís­lendingum eru stranda­glópar í Finn­landi nokkrum dögum fyrir jól.

„Það er engin leið að ná í Icelandair. Þeir svara ekki í gegnum net­spjallið og við fáum bara sím­svarann ef við reynum að hringja,“ segir Guð­rún.

„Mér finnst mjög slæmt að þegar það er ein­stak­lingur sem er að koma úr stórri skurð­að­gerð að það sé ekki reynt að bóka mann með ein­hverju öðru flug­fé­lagi í stað þess að láta okkur bíða og vita ekki neitt,“ segir Guð­rún.

Eins og fyrr segir eru Guð­rún, dóttir hennar og móðir á hóteli í Helsinki. Hún býst við að Icelandair endur­greiði þeim fyrir hótel­gistinguna, en segir að allt sé svo ó­skýrt að hún í raun viti það ekki.

„Dóttur minni líður ekki vel hérna, hún vill komast heim til sín í sitt um­hverfi. Hún átti að fara í sauma­töku á Ís­landi á morgun. Einnig er ó­vissa með lyfin sem hún þarf að fá í kjöl­far að­gerðarinnar. Við getum leyst þau út heima á Ís­landi en það er allt komið í rugl núna. Ef við fáum ekki flug í dag þarf ég að fara að hringja í læknana sem skáru hana upp og at­huga hvort þeir geti út­vegað sauma­töku­tíma í Helsinki,“ segir Guð­rún.

Komast vonandi heim á morgun

Í kjölfar samtals mæðgnana við Fréttablaðið í morgun fengu þær loksins góðar fréttir. Nú eiga þær sæti með flug­fé­laginu Finnair til Kaup­manna­hafnar og þaðan með Icelandair til Ís­lands. Guð­rún segir þó að það sé enn stór hópur Ís­lendinga sem vita ekki hvernig þau eiga ferðast heim.

„Þessi hópur hefur ekki náð sam­bandi við neinn. Þau fóru út á flug­völl til að reyna fá upp­lýsingar þar, en ég mun láta þau vita hvaða leið við erum að fara,“ segir hún.

Guð­rún vonast til þess að aðrir Ís­lendingar sem eru fastir er­lendir láti í sér heyra. „Ég vona að þeir sem eru í sömu stöðu og við hafi hátt og láti vita af sér,“ segir hún.