Í lok fjórða ársfjórðungs 2020 bjuggu 368.590 manns á Íslandi, 188.900 karlar og 179.680 konur.

1080 börn fæddust en 630 einstaklingar létust. Landsmönnum fjölgaði því um 570 á ársfjórðungnum eða um 0,2 prósent.

Á höfuðborgarsvæðinu bjuggu 236.520 manns en 132.070 utan þess. Þetta kemur fram í nýrri frétt frá Hagstofu Íslands.

Fleiri elendir ríkisborgarar flytja

Níutíu einstaklingar fluttust til landsins umfram brottflutta. Aðfluttir með íslenskt ríkisfang voru 150 umfram brottflutta en brottfluttir erlendir ríkisborgarar voru 60 fleiri en þeir sem fluttust til landsins. Fleiri karlar en konur fluttust frá landinu.

Flestir flytja til Danmerkur

Flestir íslenskir ríkisborgarar fluttist til Danmerkur en þangað fluttust 100 manns á fjórða ársfjórðungi. Alls fluttust 390 brott af landi, þar af 210 til Danmerkur, Noregs og Svíþjóðar.

Flestir Íslendingar flytjast til Danmerkur.
Fréttablaðið/Pjetur

Af þeim 1.530 erlendu ríkisborgurum sem fluttust frá landinu fóru flestir til Póllands eða 590 manns.

Flestir aðfluttir íslenskir ríkisborgarar komu frá Danmörku (170), Noregi (70) og Svíþjóð (80), samtals 320 manns af 540. Pólland var upprunaland flestra erlendra ríkisborgara en þaðan fluttust 280 til landsins af alls 1.470 erlendum innflytjendum. Rúmenía kom næst en þaðan fluttust 90 erlendir ríkisborgarar til landsins. Í lok fjórða ársfjórðungs bjuggu 51.180 erlendir ríkisborgarar á Íslandi eða 13,9 prósent af heildarmannfjölda.