Tveir einstaklingar með íslenskt ríkisfang greindust á síðastliðnum sólarhring með Covid-19. Viðkomandi komu til landsins fyrir sjö dögum frá skilgreindu áhættusvæði og völdu að fara í sóttkví við komuna.

Þeir fóru í skimun eftir að hafa fundið fyrir einkennum kórónaveirunnar. Þetta kemur fram í tilkynningu frá almannavarnadeild ríkislögreglustjóra og sóttvarnalækni.

Einn með jákvætt sýni í Norrænu

Þá reyndist einn farþega um borð í Norrænu sem kemur til Seyðisfjarðar á morgun vera með smit. Ekki er vitað hvort smitið sé gamalt en viðkomandi er ekki með einkenni veirunnar.

Með einstaklingnum í ferð eru fimm aðrir og eru allir í einangrun um borð í skipinu. Aðrir farþegar eru ekki taldir útsettir fyrir smiti.

730 farþegar koma með Norrænu á morgun. Sýnataka á farþegum fór fram í Hirtshals í Danmörku áður en skipið hélt þaðan á þriðjudag.

Frekari sýnataka og mótefnamæling fer fram þegar skipið kemur til Seyðisfjarðar á morgun, segir í tilkynningunni.

2.158 sýni tekin við landamærin

Greint var frá því fyrr í dag að tveir einstaklingar hafi greinst með virkt smit við landamæraskimun í gær. Fjórir aðrir voru með jákvætt sýni og voru tveir þeirra með gamalt smit. Hinir bíða enn niðurstöðu úr mótefnamælingu og eru í einangrun á meðan.

Alls eru 11 manns í einangrun með virk smit á Íslandi en 2.158 sýni voru tekin við landamæraskimun í gær.

Fréttin hefur verið uppfærð.