Sáttmáli Alheimssamtaka heyrnarlausra um rétt allra til táknmáls var undirritaður á Bessastöðum í gær við hátíðlega athöfn. Þar með varð Ísland fyrst ríkja heims til að undirrita sáttmálann. Þetta kemur fram í tilkynningu frá Mennta- og menningarmálaráðuneytinu.

Alheimssamtökin gerðu sáttmálann í tilefni af alheimsþingi heyrnarlausra sumarið 2019. Sáttmálinn undirstrikar meðal annars ábyrgð og skyldur stjórnvalda og hagsmunaaðila til að tryggja réttlátt samfélag og jafnt aðgengi að menntun fyrir alla.

Fyrsta mál fjölda Íslendinga

„Það er mér mikil ánægja að undirrita þennan sáttmála á degi íslenska táknmálsins og þegar Félag heyrnarlausra fagnar 60 ára afmæli sínu. Íslenskt táknmál er fyrsta mál fjölda Íslendinga og við þurfum að að efla rannsóknir, kennslu og námsefnisgerð er því tengist. Við viljum tryggja að allir hafi jöfn tækifæri til menntunar, efling íslenska táknmálsins er liður í því,“ segir Lilja Alfreðsdóttir mennta- og menningarmálaráðherra.

Auk Lilju skrifuðu meðal annars Guðni Th. Jóhannesson forseti Íslands, Frú Vigdís Finnbogadóttir verndari íslenska táknmálsins, Heiðdís Dögg Eiríksdóttir formaður Félags heyrnarlausra, Jón Atli Benediktsson rektor Háskóla Íslands og Bryndís Guðmundsdóttir formaður málnefndar um íslenskt táknmál og fulltrúar málnefndarinnar undir samninginn.