Umburðarlyndi Íslendinga gagnvart innflytjendum hefur aukist á undanförnum þremur árum, samkvæmt nýrri heimskönnun Gallup. Íslendingar falla þó af toppnum frá því að síðasta könnun var gerð árið 2016, og eru nú næstumburðarlyndasta þjóð heimsins. Kanadamenn verma nú toppsætið og meðal efstu þjóða eru Bandaríkin, Svíþjóð, Írland, Ástralía og Búrkína Fasó.

Alls svöruðu 140 þúsund manns í 145 löndum spurningum Gallup. Hér á Íslandi var könnunin gerð í október og nóvember síðastliðnum, með símaviðtölum við 500 einstaklinga. Meðal annars var spurt hvort fólk væri fylgjandi því að útlendingar flyttu til landsins, flyttu í næsta hús eða giftust inn í fjölskylduna. Út frá spurningunum er reiknaður ákveðinn stuðull sem í tilfelli Íslands hækkar úr 8,26 í 8,41.

Norður-Makedóníumenn eru á botninum ásamt Ungverjum, Serbum, Taílendingum, Tyrkjum og fleirum. Í Norður-Makedóníu er stuðullinn aðeins 1,49. Viðhorfið batnaði mest milli kannana í Moldóvu en versnaði mest í Perú, sem skýrist af því að landið hefur tekið við mörgum flóttamönnum frá Venesúela að undanförnu. Alls hefur viðhorf til innflytjenda versnað, og heimsstuðullinn lækkað úr 5,34 niður í 5,21.

Þegar svörin eru greind kemur í ljós að fólk í þéttbýli, hámenntað fólk og yngra hefur jákvæðara viðhorf gagnvart innflytjendum en fólk í dreifbýli, með minni menntun og eldra. Sú greining kemur Rakel Ósk Reynisdóttur, fjölmenningarfulltrúa Háskóla Íslands, ekki á óvart. „Það er almennt séð þannig að það fólk sem ferðast meira og dvelst erlendis verður víðsýnna,“ segir hún.

Rakel er sjálf tiltölulega nýflutt erlendis frá og hún segist finna fyrir jákvæðara viðhorfi í garð útlendinga hér á landi. Þetta sjáist meðal annars í hennar eigin störfum. „Ég hef verið að leita að sjálfboðaliðum til að taka þátt í verkefni til að vinna með innflytjendum og það kom mér á óvart hversu gríðarlega margar umsóknir bárust. Fólk er mjög áhugasamt,“ segir hún.

Ólíkt mörgum öðrum Evrópulöndum hafa ekki risið upp stórir hægri popúlískir flokkar á Íslandi, sem berjast gegn innflytjendum með beinum hætti. Fylgi þeirra tveggja íslensku flokka sem byggja á útlendingaandúð hefur vart verið mælanlegt í kosningum.

Rakel segir þetta endurspegla viðhorf samfélagsins. „Við kjósum ekki þessa flokka af því að við trúum ekki á þessi sjónarmið,“ segir hún.

Rakel Ósk Reynisdóttir fjölmenningarfulltrúi. Mynd/Háskóli Íslands