Ingólfur Þórarinsson, betur þekktur sem Ingó veðurguð, segir ekkert til í ásökunum um kynferðisofbeldi af hans hálfu. Hópurinn Öfgar birti nafnlausar sögur rúmlega tuttugu kvenna á TikTok sem lýsa kynferðisofbeldi og áreitni sem konurnar segjast hafa lent í frá Ingólfi.
„Maður er orðinn ringlaður. Ég veit hver ég er og hvað ég hef gert og ég held að það sem er satt eigi eftir að koma í ljós“, segir Ingólfur í samtali við Vísi.
Meint kynferðisofbeldi Ingólfs hefur verið mikið til umræðu á samfélagsmiðlum á borð við TikTok og Twitter í kjölfar seinni bylgju #metoo hreyfingarinnar sem hófst í maí.
@ofgarofgar Jesús allir lúserar landsins mættir að fella kónginn. #öfgar #islenskt #islenskttiktok
♬ Get You The Moon - Timmies
Segist upplifa þetta sem árás
Ingólfur segist upplifa ásakanirnar sem árás og segist hafa miklar áhyggjur af sínum nánustu í tengslum við umræðuna.
„Þetta er farið að hafa áhrif atvinnulega og aðallega er þetta leiðinlegt fyrir fólkið sem þekkir mann, að þurfa að standa í þessu. Þetta er orðið svo gróft núna,“ segir hann.
Ingólfur er að sögn þegar byrjaður að leita réttar síns en ekki kemur fram hvort eða hverja hann hyggist kæra.
„Í stuttu máli verður þessu öllu svarað eftir réttum leiðum. Svona á ekki að vera hægt að gera gagnvart einstaklingi og ég á eftir að skoða vel hvað ég geri. Ég mun leita réttar míns og er byrjaður á því,“ segir Ingólfur.
