Þingmenn Miðflokksins sem sátu á hótelbarnum á Klaustri í liðinni viku hafa sent frá sér yfirlýsingu. Undir hana rita þau Sigmundur Davíð Gunnlaugsson, Gunnar Bragi Sveinsson, Bergþór Ólason og Anna Kolbrún Árnadóttir.

Þar segjast þau það ekki hafa verið ætlun sýna að meiða neinn og að ljóst sé að „talsmáti sem þarna var á köflum viðhafður er óafsakanlegur.“

Þau segjast ætla að læra af þessu og muni leitast við því að sýna kurteisi og virðingu fyrir samferðafólki sínu. Auk þess biðja þau fjölskyldur sínar og aðra flokksmenn Miðflokksins afsökunar. 

Yfirlýsinguna er hægt að lesa hér að neðan í heild sinni.

Við fjórir þingmenn Miðflokksins sem sátum á hótelbarnum Klaustri í liðinni viku viljum biðja þá sem farið var ónærgætnum orðum um í þeim einkasamtölum sem þar fóru fram einlæglegrar afsökunar.  Það var ekki ætlun okkar að meiða neinn og ljóst má vera að sá talsmáti sem þarna var á köflum viðhafður er óafsakanlegur.  Við einsetjum okkur að læra af þessu og munum leitast við að sýna kurteisi og virðingu fyrir samferðarfólki okkar.  Jafnframt biðjum við flokksmenn Miðflokksins og fjölskyldur okkar afsökunar á að hafa gengið fram með þessum hætti.

Sigmundur Davíð Gunnlaugsson
Gunnar Bragi Sveinsson
Bergþór Ólason
Anna Kolbrún Árnadóttir