Ingibjörg Ólöf Isaksen, bæjarfulltrúi á Akureyri, vermir fyrsta sæti lista Framsóknar í Norðausturkjördæmi fyrir Alþingiskosningar næsta haust. Hún hafði betur í póstkosningu flokksins en sitjandi þingmaður flokksins, Líneik Anna Sævarsdóttir.
Líneik Anna verður í 2. sæti og Þórarinn Ingi Pétursson verður í 3. sæti. Fyrst er greint frá á vefnum Akureyri.net.
Þar kemur fram að póstkosning stóð yfir allan marsmánuð en atkvæðin voru talin í dag og niðurstaðan kynnt í kvöld.
Á kjörskrá voru 2.207 og niðurstaðan varð sem hér segir:
1. sæti, Ingibjörg Ólöf Isaksen, framkvæmdastjóri Læknastofa Akureyrar. Hún fékk 612 atkvæði í 1. sæti
2. sæti, Líneik Anna Sævarsdóttir, alþingismaður Fáskrúðsfirði. Hún fékk 529 atkvæði í 1.-2. sæti
3. sæti, Þórarinn Ingi Pétursson, bóndi Grýtubakkahreppi. Hann fékk 741 atkvæði í 1.-3. sæti.
4. sæti, Helgi Héðinsson, oddviti Skútustaðahrepps. Hann fékk 578 atkvæði í 1.-4. sæti.
5. sæti, Halldóra Hauksdóttir, lögmaður Akureyri. Hún fékk 547 atkvæði í 1.-5. sæti.
6. sæti, Kristinn Rúnar Tryggvason, bóndi Kelduhverfi. Hann fékk 496 atkvæði í 1.-6. sæti.
Aðrir sem tóku þátt í póstkosningunni og komust ekki að voru þau Jón Björn Hákonarson sem er ritari Framsóknarflokksins og bæjarstjóri Fjarðabyggðar, Karítas Ríkharðsdóttir, blaðamaður Raufarhöfn, og Jónína Brynjólfsdóttir, viðskiptalögfræðingur Egilsstöðum.
