Ingi­björg H. Sverris­dóttir, for­maður Fé­lags eldri borgara í Reykja­vík og ná­grenni (FEB), mun gefa kost á sér í 4. til 5. sæti á lista Sjálf­stæðis­flokksins í Reykja­vík fyrir komandi Al­þingis­kosningar en Ingi­björg til­kynnti um málið í morgun.

Hún vísar til þess að for­menn stærstu fé­laga eldri borgara hafi síðast­liðinn febrúar sent frá sér á­skorun til allra flokka sem eru með sæti á Al­þingi um að tryggja eldra fólki sæti á fram­boðs­listum þeirra þar sem ein­staklingar 60 ára og eldri verða 75 þúsund hér á landi á árinu, þar af 45 þúsund 67 ára og eldri.

„Þessi hópur þarf rödd í sam­fé­laginu. Ég hef því á­kveðið að gefa kost á mér enda brenn ég fyrir hags­munum eldri borgara,“ segir Ingi­björg. „Mál­efni og kjör eldra fólks eiga hug minn allan og ég mun ekki láta mitt eftir liggja í bar­áttunni fram undan fyrir bættum lífs­gæðum eldra fólks.”

Starfaði í ferðageiranum

Ingi­björg er fædd árið 1947 og vann yfir­burðar sigur á aðal­fundi FEB sem haldinn var á dögunum en hún tók við for­menns­kunni af Ellerti B. Schram sem sat áður á Al­þingi, bæði fyrir Sjálf­stæðis­flokkinn og Sam­fylkinguna

Hún ólst upp í Reykja­vík og Vest­manna­eyjum en hún hefur starfað í ferða­geiranum bæði er­lendis og hér­lendis. Hún starfaði síðast hjá Air At­lanta áður en hún fór á eftir­laun.

Ingi­björg stundaði tungu­mála­nám í Þýska­landi og Spáni á yngri árum og á full­orðins­árum við Mennta­skólann í Hamra­hlíð og síðar við Há­skóla Ís­lands í ferða­mála­fræðum. Hún hefur setið ótal ráð­stefnur og endur­menntunar­nám­skeið í ýmsum greinum í tengslum við störf sín hverju sinni. Þá hefur Ingi­björg sinnt kennslu í þremur ferða­mála­skólum hér­lendis og kennt verðandi ferða­ráð­gjöfum.