Inga Sæland formaður Flokk fólksins gat ekki haldið aftur af tárunum er hún ræddi eingreiðslur til öryrkja á Alþingi í dag. Áætlað er að Alþingi muni samþykkja 60 þúsund króna eingreiðslu til öryrkja sem mun greiðast út fyrir 31. desember.
Inga sagðist ánægð með þá ákvörðun en furðaði sig á því af hverju væri verið að skilja eftir almannatryggingaþegum sem ekki síður þurfa á þessari eingreiðslu um jólin. „Ég tala hér um eldra fólk sem býr í sárri neyð og voru öryrkjar áður,“ sagði Inga en fólk telst ekki lengur öryrkjar eftir 67 ára aldur.
Inga opnaði sig síðan og sagði frá eigin reynslu af fátækt er hún var í þeirri stöðu að eiga ekki efni á jólamat en Inga Sæland var öryrki áður en hún var kjörin á þing
„Ég hef alltaf verið mikið jólabarn en það var ömurlegt á þessum tíma að sjá fram á það að ég gat ekki boðið upp á neitt öðruvísi en það sem ég átti i kistunni,“ sagði Inga. „Ég átti enga peninga. Ég var búin að borga leiguna það var alltaf það fyrsta sem ég borgaði,“ bætti hún við.
„En ég var lánsöm að því leyti til að einn af mínum yndislegu sonum sem kom í heimsókn til pabba og mömmu. Hann rétti mér 60 þúsund krónur og sagði mamma ég vil fá að bjóða okkur í mat um jólin. „Það var í rauninni erfitt að þiggja það Ekki að ræða það. Ég á nóg af peningum og þið ekki. Ég vil fá að bjóða ykkur í mat um jólin. Þið hafið fætt mig og klætt fram að þessu og nú er komið að mér,“ sagði Inga og byrjaði að klökkna.
„Ég á ekki að tala um dæmisögur. Þá fer ég alltaf í einhverja sorg,“ sagði Inga og þerraði tárin úr augunum.
„Svo eru það líka ömmur og afar. Sára fátækt fólk sem biður aldrei um neitt. Þau eru lítillát og biðja aldrei um neitt. Þau treysta sér ekki einu sinni til að leita sér hjálpar í hjálparstofnunum,“ sagði Inga. Hún sagði dæmisögu af eldri hjónum sem þurfa að greiða 900 þúsund krónur til að laga tennurnar í konunni. „Hún er búin að þurfa að fara í aðgerð og allt. Við eigum ekki þessa peninga,“ sagði eiginmaðurinn við Ingu að hennar sögn.
Inga lagði til breytingartillögu þar sem eingreiðslan myndi ná einnig til þeirra sem væru eldri en 75 ára. Þannig að 6000 ellilífeyrisþegar myndu fá eingreiðslu fyrir 31. desember 2022.
„Ég bara get ekki talað lengur. Ég er orðin svo sorgmædd yfir þessu öllu. Ég skil ekki af hverju við látum svona. Af hverju við erum ekki góð við þá sem eiga bágt og eru að biðja okkur um að hjálpa sér. Kusu okkur á þing til að hjálpa sér,“ sagði Inga og bætti við að henni fannst þetta óskiljanlegt áður en hún lauk máli sínu.
Fréttin hefur verið leiðrétt. Fyrst stóð að fólk sé ekki lengur skráð öryrkjar eftir 75 ára aldur en það er 67 ára aldur.
