Íbúðum á höfuðborgarsvæðinu hefur fjölgað um 112 frá því í byrjun nóvember, en alls 1.429 íbúðir eru nú til sölu á höfuðborgarsvæðinu. Þá eru 2.393 íbúðir til sölu á landinu öllu. Útgefnir kaupsamningar hafa ekki verið færri á höfuðborgarsvæðinu síðan 2013, en þeir eru 382 talsins miðað við árstíðaleiðréttar tölur. Þetta kemur fram í mánaðarskýrslu Húsnæðis- og mannvirkjastofnunar.
Samdrátturinn hefur þó verið enn hraðari í nágrannasveitarfélögum höfuðborgarsvæðisins undanfarið, en þar voru útgefnir samningar níutíu og sex talsins í október og níutíu og tveir í september. Til samanburðar voru þeir 151 í ágúst.
Þá voru hlutfallslega færri íbúðir seldar yfir ásettu verði í nóvember samanber við október, en í október seldust 24,3 prósent íbúða yfir ásettu verði en einungis 19,7 prósent í nóvember. Í apríl síðastliðnum, þegar mest var, seldust ríflega 65 prósent íbúða yfir ásettu verði.
Áfram dregur úr 12 mánaða hækkun íbúðaverðs á höfuðborgarsvæðinu miðað við vísitölu íbúðaverðs. Hún er komin niður í 20,3 prósent en var hæst í 25,5 prósent í júlí. Dregið hefur mun hraðar úr íbúðaverðshækkunum er miðað er við vísitölu paraðra viðskipta og er 12 mánaða hækkun hennar komin niður í þrettán prósent.
Þá hækkaði leiguverð á höfuðborgarsvæðinu um tvö prósent milli mánaða í nóvember miðað við vísitölu leiguverðs. Tólf mánaða hækkun hennar mælist 9,4 prósent, sem er jafn mikið og verðbólga mældist í nóvember. Það þýðir að raunverð leigu hefur staðið í stað milli ára þrátt fyrir einhverja hækkun síðan í júlí.
Í nágrannasveitarfélögum höfuðborgarsvæðisins hefur hlutdeild nýrra íbúða í sölutölum lækkað skarpt undanfarna mánuði þrátt fyrir að framboð nýrra íbúða til sölu hafi aukist meira en framboð annarra íbúða, sem sætir tíðindum. Það er mögulega vísbending um að dregið hafi meira úr eftirspurn í nágrannasveitarfélögum en á höfuðborgarsvæðinu.
Talsverð hreyfing er á húsnæðisbótaþegum. Stór hluti þeirra sem þiggja húsnæðisbætur gera það tímabundið. Af þeim 18.100 sem þáðu bætur einhvern tímann á árinu 2017 voru einungis 8.300 sem þáðu einnig bætur á þessu ári, eða um 46 prósent.
Í ljósi þess að fyrsti hópurinn inniheldur ekki aðeins þá sem þáðu fyrst bætur 2017 heldur einnig þá sem höfðu fengið áður bætur þá vekur athygli að það fækkar nærri jafn hratt í þeim hópi á milli ára eins og hjá þeim sem hófu síðar að þiggja bætur.
Til lengri tíma litið virðast flestir annaðhvort fara af leigumarkaði eða tekjur þeirra aukast, sem gerir það að verkum að þeir fullnægja ekki lengur skilyrðum fyrir húsnæðisbætur.
