Amerie Jo Garza, tíu ára stúlka í fjórða bekk Robb-barna­skólans í Uvald­e í Texas, var skotin til bana þegar á­rásar­maðurinn sá hana draga upp símann sinn til að hringja eftir að­stoð. Amerie var í hópi ní­tján barna sem drepin voru af hinum 18 ára gamla Salvador Ramos í gær.

Banda­rískir fjöl­miðlar hafa fjallað ítar­lega um skot­á­rásina í gær sem er sú mann­skæðasta í skólum Banda­ríkjanna frá árinu 2012.

Berlinda Irene Arreola missti barna­barn sitt, Amerie, í á­rásinni í gær og ræddi hún þennan skelfi­lega at­burð við blaða­mann Daily Beast í gær­kvöldi. Berlinda segist hafa fengið þær upp­lýsingar að Ramos hafi gengið, þung­vopnaður og í hlífðar­galla, inn í skóla­stofuna þar sem Amerie og bekkjar­fé­lagar hennar sátu og til­kynnt þeim að þau myndu öll deyja.

Berlinda segir að Amerie hafi verið með símann sinn á sér og hafi reynt að hringja í neyðar­línuna eftir að­stoð. Þegar Ramos tók eftir því að hún var að hringja hafi hann skotið hana til bana. „Í stað þess að taka símann af henni og brjóta hann þá skaut hann hana. Hún sat við hliðina á besta vini sínum þegar þetta gerðist,“ sagði Berlinda við Daily Beast.

Robb-barna­skólinn er ætlaður nem­endum í fyrsta til fjórða bekk og létust ní­tján börn sem fyrr segir auk tveggja kennara. Tíu ára stúlka liggur lífs­hættu­lega slösuð á sjúkra­húsi og þá er 66 ára kona, sem talin er vera amma Ramos, einnig í lífs­hættu á sjúkra­húsi.

Ramos, sem var 18 ára, var skotinn til bana fyrir utan skólann í gær. Honum var lýst sem hlé­drægum og hæg­látum ein­stak­lingi en hafði þó látið í veðri vaka á sam­fé­lags­miðlum að hann myndi mögu­lega fremja voða­verk af þessu tagi.