Sérstök tilraunaútgáfa Hyundai á rafknúna vetnisbílnum Nexo setti í vikunni hraðamet í sínum flokki á Saltsléttunni í Bonneville í Utah í Bandaríkjunum þegar ökumaður

tækniþróunardeildar fyrirtækisins í Bandaríkjunum, Dean Schlingmann, náði 170,8 km hraða á Nexo. Við sama tækifæri náði Schlingmann hraðameti undir stýri á tilraunaútgáfu nýs Hyundai Sonata Hybrid þegar bíllinn náði 265 km hraða sem er hraðamet í flokki tvinnbíla. Bæði metin hafa verið staðfest af Alþjóðaakstursíþróttasambandinu FIA (FIA World Land Speed Records).

Báðir tilraunabílarnir voru útbúnir og prófaðir í samstarfi starfsmanna hjá tæknisetri Hyundai í Bandaríkjunum og Hyunday Motor Company í S-Kóreu í tengslum við árlega tækniþróunarsýningu SEMA í Las Vegas. Þeir voru sérstaklega útbúnir vegna tilraunarinnar, svo sem með sérstyrktu öryggisbúri í farþegarými, öryggissæti og 6 punkta öryggisbelti ásamt sérútbúnu fjöðrunarkerfi, höggdeyfum og fleiru til að tryggja hámarksöryggi ökumannsins Dean Schlingmann, sem jafnframt er verkfræðingur hjá tækniþróunarsetri Hyundai vestanhafs.

Aukin sala hjá Hyundai á árinu

Hyundai Motor Company hefur átt mikilli velgengni að fagna á árinu, ekki síst á Evrópumarkaði þar sem sala Hyundai Europe fyrstu níu mánuði ársins var 0,8% meiri en á sama tímabili 2018, öfugt við almenna söluþróun í greininni á tímabilinu þar sem hún var 1,6% minni fyrstu þrjá ársfjórðungana samkvæmt tölum Samtaka evrópskra bílaframleiðenda ACEA. Helstu vaxtarsvæði Hyundai á árinu hafa verið Þýskaland með rúmlega 12% aukningu og Frakkland þar sem salan var um 9% meiri á tímabilinu saman borið við sama tíma 2018. Helstu sölubílarnir eru jepplingurinn Tucson og borgarjepplingurinn Kona auk fólksbílanna i10, i20 og i30. Þá hafa Evrópulödin einnig tekið rafbílum Hyundai vel, ekki síst Kona EV, þar sem bílaverksmiðja fyrirtækisins annar vart eftirspurn. Hyundai gerir ráð fyrir að skila enn betri afkomu á árinu 2020 en á yfirstandandi ári.