Tveggja metra há reður­stytta úr viði var höggin niður um helgina af fjalls­hlíð í Bæjar­landi sam­kvæmt All­ga­eu­er Zeitung. Styttan hafði verið stað­sett á Grünten fjalli um ára­bil en það eina sem er eftir af henni núna er lítill trjá­stubbur.

Ekki er vitað hver höfundur verksins er en það hefur orðið eins­konar kenni­leiti á svæðinu. Ár hvert leggja margir göngu­garpar leið sína að styttunni og hvíla þar lúin bein.

Það liggur heldur ekki fyrir hvernig 200 kílóa styttunni var komið upp á fjalls­hlíðina. Kenningin, sam­kvæmt staðar­miðlum, er að styttan hafi verið búin til af hópi ungra manna sem gáfu hana í af­mælis­gjöf í gríni. Þegar gjöfin sló ekki í gegn hjá vini þeirra hafi mennirnir dregið hana upp fjallið á sleða þannig að sem flestir gætu dáðst að henni.

Óvíst hvort um glæp sé að ræða

Styttan hefur nú staðið á fjalls­tindinum í fimm ár og þótti aldrei til­efni til að færa hana þaðan, hvorki hjá lög­reglu eða bæjar­yfir­völdum. Lög­reglan hóf rann­sókn á hvarfinu í gær en kveðst ekki vera viss hvað skuli gera þegar söku­dólgurinn finnist.

„Við vitum ekki hvort þetta sé glæpur eða ekki,“ sagði full­trúi lög­reglunnar í sam­tali við All­ga­eu­er Zeitung. Einnig yrði flókið að á­kveða á hverjum hafi verið brotið þar sem ekki sé vitað hver eig­andi styttunnar sé.

Bæjar­stjóri í ná­granna­bænum Ret­ten­berg, Nikolaus Weissin­ger, sagði það vera synd að styttan hafi verið fjar­lægð.