Halldór Auðar Svansson, fyrrum borgarfulltrúi Pírata, er í formlegu bataferli frá afleiðingum kynferðisofbeldis. Þetta kemur fram í pistli Halldórs á Facebook þar sem hann fer yfir mátt hugleiðslunnar og hvernig hún hjálpaði honum að skilja tilfinninguna sjálfshatur. Halldór hefur áður opnað sig um kynferðisofbeldi sem hann varð fyrir í æsku.

„Hugleiðslan hjálpar virkilega til við að þjappa erfiðum tilfinningum í demanta, þó það útheimti stundum mikla þolinmæði, segir Halldór í pistlinum. Hann hefur undanfarið sótt viðtalstíma hjá Stígamótum og hópmeðferð þegar hann hefur haft tök á. „Þetta hefur dregið fram mikinn sársauka og rússíbana tilfinninga en það er gott að geta deilt því að inn á milli rofar til,“ heldur hann áfram.

Hann segist hafa hugleitt í gær, eins og hann gerir í hálftíma á hverjum degi, en við hugleiðsluna tókst honum að skilja tilfinninguna sjálfshatur og hvað hún hefur verið undirliggjandi, þrálát og skemmandi.

„Hugleiðslan gaf mér rými til að skoða hana, velta því fyrir mér hvað þessi tilfinning er eiginlega, hvað setningin „Ég hata sjálfan mig“ þýðir,“ segir Halldór. Þá rann það upp fyrir honum að setningin er í raun þversagnakennd: „Það er enginn einn hluti af mér sem hatar annan hluta, ekkert 'ég' sem hatar og annað sem er hatað.“

„Tilfinningin er ekki hluti af mér, hún er hatrið sem var hellt yfir mig og ég hef borið með mér af því það var yfirþyrmandi. Að mörgu leyti hef ég unnið úr því en ég hef ekki verið tilbúinn til að horfast svona lóðbeint í augu við það áður,“ heldur hann áfram.

Færsluna má sjá í heild sinni hér að neðan.

Ég er í formlegu bataferli frá afleiðingum kynferðisofbeldis, fannst ég ekki hafa val um annað en að fara að taka þetta...

Posted by Halldór Auðar Svansson on Tuesday, August 6, 2019