„Erum við nóg? Er í lagi að vera mennsk, er í lagi að opna umræðu um geðheilbrigðismál og hvað vantar í umfjöllunina?“ Notendasamtökin Hugarafl varpa fram þessum spurningum sem innleggi í umræðuna um geðheilbrigðismál, sjálfsvíg og „ég er nóg“-boðskap Öldu Karenar Hjaltalín í kjölfar Kastjóssþáttarins á þriðjudagskvöld þar sem Alda Karen og Hafrún Kristjánsdóttir sálfræðingur tókust á um hugmyndir þeirrar fyrrnefndu sem hún kallar „lífslykla.“

Sjá einnig: Íslendingar rasandi á Twitter eftir Kastljós í gær

Hugarafl fundaði daginn eftir að þátturinn var sýndur og niðurstöður þess fundar eru reifaðar í fréttatilkynningu þar sem innleggi Öldu Karenar er fagnað og um leið gagnrýnt að „þaullært“ fagfólk virðist telja sig hafa einkaleyfi á umræðunni um viðkvæm geðheilbrigðismál.

„Mörg okkar í Hugarafli þekkjum á eigin skinni hvernig það er að langa ekki að lifa lengur og vitum vel að vandinn er margþættur, orsakirnar djúpstæðar og hvert og eitt okkar þarf að finna sína leið úr öngstrætinu,“ segir í tilkynningunni og því bætt við að þetta verði „vissulega ekki einfaldað í eina fullyrðingu líkt og „ég er nóg“.“

Þau sjái hins vegar margt athugavert við viðtalið í Kastljósi og þykir fréttamaðurinn Einar Þorsteinsson hafa gengið hart að Öldu Karen og að gagnrýni Hafrúnar á málflutning hennar hafi verið einhliða. „Hér hefur opnast tækifæri til umræðu um geðheilbrigðismál og við kunnum Öldu þökk fyrir það.“

Skortur á innsýn

Þess er jafnframt getið að í umfjöllun Kastljóssins hafi vantað „algjörlega innsýn einstaklinga með persónulega reynslu af slíku öngstræti.“ Sálfræðingurinn hafi teiknað upp „svarta mynd af sjálfsvígshugsunum og -tilraunum sem virtust í umræðunni einungis enda á einn veg; það er með fráfalli einstaklingsins.“

Sjá einnig: Skyndilausnir duga ekki við alvarlegum vanda

Orðræðan er sögð afar sjúkdómsmiðuð og „mikið gert úr geðsjúkdómastimplinum,“ þannig að „vonleysið var algjört“ og þeim hafi virst sem „einungis þaullærðir fagaðilar mættu ræða þessi mál og enginn annar.“

Hugarafl vill í ljósi þessa koma eftirfarandi á framfæri:

Það er von. Þú getur verið í öngstræti og náð góðri líðan á nýjan leik. Við þekkjum það á eigin skinni að vera í svartasta svartnætti en finna tilgang og áframhaldandi tilvist hér á jörðu. 

Það eru til leiðir til að líða betur. Það er til fullt af valmöguleikum og það er okkar verkefni að prófa okkur áfram og finna hvað hentar okkur til að ná bata.

Það er í lagi að tala um það ef okkur langar ekki að lifa lengur. Það skiptir máli að hafa einhvern sem hlustar. Svo þegar við erum komin á betri stað er líka í lagi að deila því sem hefur virkað fyrir okkur persónulega. Jafnvel einföldum ráðum eins og möntrum!