Speglar Veðurstofunnar sem notaðir eru til að mæla hreyfingar í jarðlögum nærri Seyðisfirði mældu í dag hreyfingar nærri því svæði þar sem stór skriða féll 18. desember á síðasta ári úr Botnabrún milli Búðarár og Stöðvarlækjar. Byggð á Seyðisfirði stafar ekki hætta af þessu en hreyfingin er tilefni til þess að gæta sérstakrar varúðar við vinnu á skriðusvæðinu auk þess sem varað er við ferðum gangandi upp í hlíðina.

Í tilkynningu frá almannavarnadeild ríkislögreglustjóra og lögreglustjóranum á Austurlandi segir að spegilinn sé skammt ofan innanverðra skriðuupptakanna. Greint hefur verið frá því á íbúafundum að það megi gera ráð fyrir því að það hrynji úr bröttu brotstáli stóru skriðunnar á næstu mánuðum meðan jarðlög þar leita nýs jafnvægis og er hreyfingin nú túlkuð sem hluti af þessu ferli.

Reistir hafa verið varnargarðar ofan íbúðarhúsa næst skriðusvæðinu sem draga úr hættu á því að frekari skriðuföll úr upptökum stóru skriðunnar skapi hættu í byggðinni.

Rauntímavöktun Veðurstofu er á mælum í hlíðinni ofan Seyðisfjarðar.