Hreinsunarvinnu innan áhrifasvæðis skriðunnar sem féll á Seyðisfjörð 18. desember var stöðvuð rétt fyrir hádegi í dag af öryggisástæðum.

Líkt og greint var frá fyrr í dag barst tilkynning um að sprunga í skriðusárinu hefði stækkað. Auk þess ákvaðu stjórnendur síldarvinnslunnar á Seyðisfirði að stöðva vinnslu. Eftir yfirferð ofanflóðavaktar Veðurstofu Íslands, á fjarlægðarmælingum á speglum, var ljóst að ekki var um hreyfingar á jarðlögum að ræða en við vettvangskönnun var ljóst að hrunið hafði úr börmum sprungunnar og hún orðið greinilegri. Ekki var því talin frekari hætta á skriðuföllum út frá þessum athugunum.

Talsverðri úrkomu er spáð á Seyðisfirði eftir miðnætti aðfaranótt laugardags. Dregur úr úrkomuákefð eftir kl. 15 síðdegis á laugardag. Spáð uppsafnaðri úrkoma á þeim tíma, um 50 mm. Byrjar mögulega sem slydda fyrsta klukkutímann. Hlýnar heldur en megnið af tímanum verður slydda yfir 200 m og snjókoma yfir 300 m. Hlýnar svo eftir hádegi á laugardag og fer snjólína upp í 800-900 m. Áfram dálítil væta seinnipartinn á laugardag og á sunnudag, um 15 mm uppsafnað er spáð á þeim tíma.

Fram kemur til tilkynningu frá Almannavörnum kann að koma til frekari rýminga á Seyðisfirði vegna úrkomunnar sem spáð er á laugardag. Staðan verður endurmetin á morgun.