Hreinn Loftsson og Eydís Arna Líndal hafa verið ráðin aðstoðarmenn Áslaugar Örnu Sigurbjörnsdóttur, dómsmálaráðherra.

Hreinn Loftsson lauk laganámi við Háskóla Íslands árið 1983 og öðlaðist réttindi til málflutnings fyrir Hæstarétti árið 1993. Hann á að baki fjölbreyttan feril í lögmennsku, atvinnulífi, stjórnsýslu og sem aðstoðarmaður ráðherra í nokkrum ráðuneytum frá árinu 1985 til 1992, þar á meðal Davíðs Oddssonar í forsætisráðuneytinu.

Hreinn starfaði sem lögmaður fyrst á eigin stofu og síðan sem meðeigandi lögmannsstofunnar að Höfðabakka. Frá 2014 hefur hann starfað sjálfstætt. Hreinn hefur setið í stjórnum fjölmargra fyrirtækja eins og Baugur Group, nefnda og félaga, auk starfs á vettvangi stjórnmála.

Eydís Arna lauk MA próf í lögfræði frá Háskóla Íslands 2016 en starfaði á lögmannsstofunni Lagaþingi frá árinu 2011, fyrst í hlutastarfi með námi, en síðar sem lögfræðingur. Hún hefur að undanförnu verið starfsmaður þingflokks Sjálfstæðisflokksins.

Tilkynning ráðuneytis um ráðningu Hreins og Eydísar.