Hregg­viður Jóns­son, stjórnar­for­maður og aðal­eig­andi Veritas, hefur á­kveðið að stíga til hliðar úr stjórn fyrir­tækisins og stjórnum tengdra fyrir­tækja, í kjöl­far á­sakana Vítalíu Lazareva.

Hregg­viður er einn þeirra fjögurra manna sem Víta­lía hefur nafn­greint í tengslum við málið og varðar at­vik sem átti sér stað í sumar­bú­staðar­ferð. Fyrr í dag var greint frá því að Ari Edwald, fram­kvæmda­stjóri Ísey út­flutnings, væri kominn í leyfi frá störfum vegna málsins.

Lög­maður Hregg­viðs, Eva B. Helga­dóttir, sendi frá sér yfir­lýsingu nú á þriðja tímanum fyrir hönd um­bjóðanda síns.

„Ég harma að hafa ekki stigið út úr að­stæðum sem ung kona hefur skýrt frá og fjallað hefur verið um í sumum fjöl­miðlum. Það er afar þung­bært að heyra um hennar reynslu. Ég lít þetta mál al­var­legum augum og þrátt fyrir að ég hafi ekki gerst brot­legur við lög þá mun ég stíga til hliðar úr stjórn Veritas og stjórnum tengdra fyrir­tækja til að raska ekki þeirra mikil­vægu starf­semi.“

At­vikið í um­ræddum sumar­bú­stað átti sér stað í desember 2020 en Víta­lía var í sam­bandi með einum mannanna, þekktum manni sem starfar sem einka­þjálfari. Í hlað­varps­þættinum Eigin konur með Eddu Falak lýsti Víta­lía at­vikinu meðal annars með þessum orðum:

„Þetta fór alveg yfir öll mörk sem hægt var að fara yfir. Fólk áttar sig ekki á því hversu stórt þetta var, margir halda að þetta hafi verið „bara“ þukl en þetta fór yfir öll mörk hjá öllum.“

Eins og greint var frá fyrr í dag er Ari Edwald, einn fjór­menninganna, kominn í leyfi frá störfum en hann óskaði sjálfur eftir því, að því er fram kom í frétt Stundarinnar. Haft var eftir Elínu Margréti Stefáns­dóttur, stjórnar­for­manni Ísey, að um tíma­bundna ráð­stöfun væri að ræða en fram­haldið myndi ráðast á næstunni.