Fáir fuglar koma jafn oft fyrir í íslenskum þjóðsögum og hrafninn, enda talinn spáfugl og oftar en ekki illur fyrirboði. Allir kannast við biksvartan krumma, enda algengur staðfugl um allt land og langstærstur íslenskra spörfugla. Því kemur ekki á óvart að nafn hans komi oft fyrir í íslenskum örnefnum. Eitt slíkt er fjallið Hrafnabjörg austan Þingvallavatns; klettum klæddur stapi sem gnæfir yfir umhverfið og nær mest 763 m hæð. Þarna sést oft til hrafna, ekki síst á veturna þegar þeir hópast saman, jafnvel í tugum, og leggja á ráðin. Kallast það hrafnaþing, sem síðar hefur verið yfirfært á mannamót. Nafngiftin er komin úr þjóðsögu sem segir að hrafnaþing eigi sér stað á haustin og skipi hrafnarnir sér tveir og tveir niður á bæi í leit að einhverju ætilegu.

Ganga á Hrafnabjörg tekur 3-4 klst. og hentar vel fyrir alla aldurshópa. Auðveldast er að hefja gönguna við vörðu sem kallast Bragabót og er ekið að henni af svokallaðri Gjábakkaleið, gamla veginum milli Þingvalla og Laugarvatns. Við fjallið Stóra-Dímon er fylgt 3 km slóða norður að bílastæði við vörðuna. Þaðan liggur stikuð gönguleið yfir mosavaxið Þjófahraun og eru fallegir gígar og hraunmyndanir á leiðinni. Gangan að rótum Hrafnabjarga tekur tæpa klst. en síðan taka við brekkur suðaustanmegin í fjallinu og er stefnan tekin í norður á hæsta tindinn. Þar sést yfir Þingvallavatn en einnig Hengilssvæðið, Esju, Skálafell, Botnssúlur, Ármannsfell, Ok, Þórisjökul og Skjaldbreið. Í vestur sést í Kálfstinda og á góðum degi glittir í Vestmannaeyjar. Á leiðinni heim er tilvalið að krækja norður og austur fyrir Þjófahnúk (684 m), sem ekki er langt undan, og eftir það stefnt í suðvestur að Bragabót. Á veturna og snemma vors er tilvalið að ganga þessa leið á ferðaskíðum, t.d. af Gjábakkaleið eða frá Þingvallavegi. Hentugast er að skilja skíðin eftir við rætur Hrafnabjarga og ganga þaðan á hátindinn. Krummar geta skotið upp kollinum og bjóða jafnvel til hrafnaþings – steinsnar frá völlunum þar sem Alþingi var stofnað 930, kristnitakan átti sér stað í kringum árið 1000 og þar sem við lýstum yfir sjálfstæði okkar 17. júní 1944. Þessir hrafnar eru tæplega slæmir forboðar á fjalli sem er svo nálægt heilagasta stað íslenskrar sögu.

Nágrenni Hrafnabjarga hentar einkar vel fyrir ferðaskíði. Mynd/TG
Af tindi Hrafnabjarga er frábært útsýni í allar áttir. Hér er horft yfir að Þjófahnjúk og Kálfstindum. Mynd/TG